काठमाडौं, १९ साउन । ठमेलस्थित ऐतिहासिक  कमलपोखरी अतिक्रमण गरेर व्यापारिक कम्प्लेक्स बनाएपछि स्थानीय आक्रोशित बनेका छन् ।पुरातात्विक महत्वको सार्वजनिक जग्गा अतिक्रमण गरेर व्यापारिक केन्द्र बनाउँदा समेत सरकार मौन बसेको भन्दै स्थानीयबासीहरु रुष्ट बनेका हन् ।स्थानीयले भू-माफियाको मिलेमतोमा कमलपोखरी अतिक्रमण गरी छायाँदेवी कम्प्लेक्स निर्माण गरिएको विरोधमा आइतबार प्रदर्शन समेत गरेका छन् ।  भू–माफियाको मिलेमतोमा ऐतिहासिक कमलपोखरी मासेर निजी स्वार्थका लागि व्यापारीक कम्प्लेक्स निर्माण गरिएको प्रदर्शनकारीको आरोप छ ।

आइतबार नेवाः राजनीतिक अभियानले इन्द्रचोकबाट विरोधस्वरुप र्‍याली निकालेको थियो । उक्त र्‍याली ठमेलस्थित छायादेवी कम्प्लेक्समा पुगेर कोणसभामा परिणत भएको थियो ।र्‍याली र कोणसभामा सहभागीहरुले भूमाफियाको प्रलोभनमा परेर सरकारी कर्मचारीले कमलपोखरी अतिक्रमण गर्दा पनि महानगरपालिका र अख्तियार दुरुपयोग अनुसन्धान आयोग मौन बसेकोप्रति आपत्ति जनाएका छन् ।प्रदर्शनमा सहभागी नागरिक अगुवाहरुले कोणसभालाई सम्बोधन गर्दै ऐतिहासिक र पुरातात्विक महत्वको सार्वजनिक सम्पदा अतिक्रमण भएकोमा आपत्ति जनाएका थिए । अतिक्रमित कमलपोखरीलाई पुनः सार्वजनिक सम्पदाकै रुपमा राख्नु पर्ने उनीहरुको माग थियो ।प्रदर्शनकारीले पटकपटक ध्यानाकर्षण गराउँदा समेत सरकार मौन बसेको र स्थानीयको माग पूरा नगरे कडा आन्दोलन गर्ने चेतावनी समेत दिएका छन् ।