बिनाप्रतिस्पर्धा मेलम्ची पूर्व माओवादी कार्यकर्तालाई ठेक्का, कोरियाले ६ हजारमात्रै कामदार लैजाने

कान्तिपुर दैनिकले नेकपाको स्कुल विभाग प्रमुखमा घनश्याम भुसालले पनि दाबी गरेको समाचार लेखेको छ । ईश्वर पोखरेल वा नारायणकाजी श्रेष्ठमध्ये कसलाई स्कुल विभागको जिम्मेवारी दिने भनेर नेकपामा छलफल भइरहेका बेला अर्का नेता भुसालले पनि दाबी गरेका हुन् । बैचारिक अभियान चलाउँदै आएका भुसालले कान्तिपुरसँग भनेका छन्, ‘पार्टीभित्र न्याय छ भने त्यो विभाग मलाई दिनुपर्छ ।’

अन्नपूर्ण पोष्ट दैनिकले मेलम्ची खानेपानी आयोजनाका बाँकी काम सम्पन्न गर्न पूर्व माओवादी कार्यकर्तालाई ठेक्का दिएको समाचार छापेको छ । अन्नपूर्ण पोष्ट लेख्छ, ‘मन्त्रिपरिषदले गत जेठ ६ गते कूल ४३ करोड रुपैयाँका काम बिनाप्रतिस्पर्धा जसलाई दिए पनि हुने गरी निर्णय गरेको थियो । सोही निर्णयको आडमा अहिले ती ठेक्का धमाधम पूर्वमाओवादी कार्यकर्तालाई वितरण सुरु भएको हो । डेढ अर्ब रुपैयाँमा पूरै मेलम्चीको काम सकिने भए पनि मन्त्रिपरिषदले दुई अर्ब ६३ करोड रुपैयाँमा ठेक्का दिने निर्णय गरेको थियो ।’

नागरिक दैनिकले अठार सय ठेकेदारमाथि सरकारले छानबिन थालेको मुख्य समाचार छापेको छ । नागरिकले लेखेको छ, ‘अख्तियार दुरुपयोग अनुसन्धान आयोगले आयोगमा परेका उजुरीका आधारमा पेस्की लिएर काम नथाल्ने निर्माण कम्पनी र ठेकेदार पहिचान गरेपछि गृह मन्त्रालय काम अलपत्र पार्ने निर्माण व्यवसायीमाथि कारबाही गर्न जुटेको हो ।’

राजधानी दैनिकले मुलुकमा बर्सेनि कम्तीमा ७ देखि ८ खर्ब रुपैयाँ बराबरको कर छली हुने गरेको लेखेको छ । यदि कर छली रोकिए जनताको थाप्लोमा ऋण नै नपर्ने समाचारमा उल्लेख छ ।

कारोबार दैनिकले कोरियाले नेपालबाट साढे ६ हजारमात्रै कामदार लैजाने समाचार लेखेको छ । यसबाट भाषा परीक्षा पास गरेकाहरु पनि सीप परीक्षणको मारमा पर्ने समाचारमा लेखिएको छ । १२ हजार ९ सय नेपालीले कोरियाली भाषा परीक्षा उत्तीर्ण गरेका थिए ।