एएफसी छनोटमा नेपालको लजास्पद हार

बैशाख १३,काठमाडौं : एएफसी यू–१९ महिला च्याम्पियनसिप छनोट अन्तर्गत दोस्रो चरणमा नेपालले लजास्पद हार बेहोरेको छ । समूह ए अन्तर्गत आज भएको पहिलो खेलमा नेपालले अष्ट्रेलियासँग ११–१ को लजास्पद हार बेहोरेको हो । म्यानमारस्थित मन्डलाथिरि रंगशालामा अष्ट्रेलियाले पहिलो हाफमा ६ गोल गर्दा दोस्रो हाफमा ५ गोल थपेको थियो । पहिलो हाफको अन्तिम समयमा १ गोल फर्काएको नेपालले दोस्रो हाफमा भने केही सम्हालिएको प्रदर्शन गरेको थियो । 

डिफेन्सको एकपछि अर्को गल्तीले चौथो मिनेटबाट नै गोलको शिकार भएको नेपाल एकपछि अर्को गल्तीले लजास्पद हार ब्यहोर्न पुग्यो । नेपालका तर्फबाट १ गोल रेखा पोडेलले गरेकी थिइन् । पहिलो हाफ सकिन केही सेकेण्ड बाँकी रहँदा रेखाले अग्रता घटाउन प्रयास गरेकी थिइन् । 

प्रशिक्षक हरीओम श्रेष्ठले राष्ट्रिय टोलीबाट खेलिसकेका पाँच खेलाडीलाई मैदान उतारेका थिए । तर अपेक्षाअनुसारको प्रदर्शन गर्न टोली सफल भएनन् । त्यसो त अष्ट्रेलिया बलियो प्रतिद्वन्द्वी हो । नेपाल भन्दा फिफा बरियतामा अष्ट्रेलिया ९७ स्थान माथि छ । नेपाल १ सय ३ तथा अष्ट्रेलिया ६ औं स्थानमा रहेको छ । 

पहिलो खेलमा निकै खराब प्रदर्शन गरेको नेपालले अब समूहको अर्को खेलमा आइतबार  घरेलु टोली म्यानमारको सामना गर्नेछ । यस्तै अन्तिम खेल उज्वेकिस्तानसँग खेल्नेछ । दुइ समूहका बिजेता र उपबिजेता थाइल्याण्डमा हुने एएफसी च्याम्पियनसिपका लागि छनोट हुनेछन् । 

यसअघि गत कात्तिकमा थाइल्याण्डमा भएको पहिलो चरणमा नेपालले भारत र पाकिस्तानमाथि जित निकाल्दै दोस्रो चरणको यात्रा तय गरेको थियो । घरेलु टोली थाइल्याण्डसँग हार ब्यहोरेपनि नेपाल उत्कृष्ट उपबिजेता भएको थियो ।