काठमाडौँ, २३ फागुन । आन्दोलनरत शिक्षक र सरकारबीच ३ बुँदे सहमति भएको छ । बुधबार राति शिक्षा मन्त्रालयमा भएको वार्तामा सहमति जुटेसँगै शिक्षकहरुले आन्दोलन फिर्ता लिएका छन् ।
स्वतः स्थायी हुनुपर्ने माग राख्दै राहत, अस्थायी, करार र बालविकास केन्द्रमा कार्यरत सहयोगी कार्यकर्ताहरु आन्दोलनमा उत्रिएका थिए । उनीहरु पठनपाठन क्रियाकलाप छोडेर आन्दोलन गर्न काठमाडौं पसेका थिए । आन्दोलनका क्रममा प्रहरीले बल प्रयोग गर्दा केही घाइते समेत भएका थिए ।
वार्तामा मन्त्रालयका अधिकारी र आन्दोलनरत शिक्षकबीच सामुदायिक विद्यालयमा कार्यरत राहत अनुदान कोटामा नियुक्त शिक्षक र बालविकास केन्द्रमा कार्यरत सहयोगी कार्यकर्तालाई निश्चित मापदण्डका आधारमा स्वीकृत दरबन्दीमा परिणत गरी आन्तरिक/ खुल्ला प्रतियोगितात्मक परीक्षाबाट एकपटकका लागि स्थायीको प्रक्रियामा लैजाने सहमति भएको छ । त्यस्ता शिक्षकलाई १ पटकका लागि उमेर हद नलाग्ने पनि सहमतिपत्रमा उल्लेख छ ।
मन्त्रालय र शिक्षकबीच आन्दोलनका क्रममा घाइते भएकाहरुको उपचारका लागि आवश्यक प्रबन्ध मिलाउने सहमति पनि भएको छ । सहमतिको तेस्रो बुँदामा आन्दोलनका सम्पूर्ण कार्यक्रम स्थगित गरेर शिक्षकहरु पठनपाठमा फर्कने उल्लेख छ ।
शिक्षा ऐनमा देशभरका ४० हजार राहत शिक्षकलाई दरबन्दीमा परिणत गरी ८० प्रतिशत खुला र २० प्रतिशत आन्तरिक प्रतियोगिताद्वारा पूर्ति गर्ने प्रस्ताव सरकारले गरेपछि स्वतः स्थायी माग गर्दै उनीहरु आन्दोलित भएका थिए ।
