काठमाडौं, १८ फागुन । पाकिस्तानले शुक्रबार राती रिहा गरेका भारतीय वायु सेनाका लडाकु अभिनन्दन वर्तमानले भारतीय मिडियाले बढाईचढाई गरी समाचार दिने गरेको बताएका छन् ।
भारत आउनुअघि पाकिस्तानमा तयार पारिएको एउटा भिडियो सन्देशमा उनले यसो भनेका हुन् । उनले ‘भारतीय मिडियाको बहकावमा जनता पर्ने गरेको’ बताएका छन् ।
यद्यपि, उक्त भिडियो इडिट गरेर तयार पारिएको आशंका गरिएको छ । उनले पाकिस्तानी सेना व्यावसायीक र सहयोगी भएको पनि बताएका छन् ।
पाकिस्तान क्षेत्रमा आतंकवादी क्याम्पमा हमला गर्नका लागि छिराइएको विमानलाई पाकिस्तानी सेनाल झारेको थियो । अभिनन्दन सोही विमानका चालक थिए ।
घाइते अवस्थामा नियन्त्रणमा लिइएका उनलाई उपचार गरिएको थियो । पाकिस्तानी प्रधानमन्त्री इमरान खानको घोषणामुताविक उनलाई भारतको जिम्मा लगाइएको थियो । पाकिस्तान र भारतको पन्जाव राज्यको बाघा सीमाबाट उनी भारत प्रस्थान गराइएका थिए ।
