नासाको अन्तरिक्ष यान सूर्यको नजिक

अमेरिकाको ‘सूर्य छुने’ साहसिक अभियान ‘टच द सन’ अन्तर्गत नासको रोवोटिक अन्तरिक्ष यान सूर्यको नजिक गइरहेको छ।

‘पार्कर सोलार प्रोब’ अन्तरिक्ष यान मानव निर्मित कुनै पनि बस्तुभन्दा इतिहासमै नजिक पुगेको हाे।

यसअघि सन् १९७६ मा सूर्यको नजिक जर्मन–यूएस हिलियस २ उपग्रह पुगेको थियो। हिलियस उपग्रह ४२ दशमलब ७३ मिलियन किलोमिटर सूर्यको नजिक पुगेको थियो।

पार्कर अन्तरिक्ष यान भने त्यस दुरीलाई पुरा गरेर सूर्य नजिक पुग्ने प्रयासमा निरन्तर लागि रहेको छ। हिलियसले त्यसबेला प्रति सेकेण्ड ७० किलोमिटरको दूरी पार गरेको रेकर्ड समेत राखेको थियो।

पार्करले त्यसलाई समेत भंग गरिदिने विश्वास गरिएकाे छ। नासको अनुमान अनुसार पार्करले प्रतिसेकेण्ड १ सय ९० किलो मिटरको दूरी पार गर्दै सूर्य नजिक पुग्नेछ।

पार्कर रोवोटिक अन्तरिक्ष यान यसै वर्षको अगष्ट महिनामा सूर्य छुने अभियानका साथ उडेको थियो। नासाले यसको नियमन गरिरहेको छ।

पार्करले सूर्यको बाहिरी सतहमा पुगेर त्यहाँको वायुमण्डलको सूचना संकलन गर्नेछ। त्यहाँको सूचना संकलन गर्न सकिए सूर्यको ऐतिहासिक रहस्यहरु खोतल्न सकिने नासाले विश्वास लिएको छ।

आगामी वर्षहरुमा पार्कर सूर्यको कक्षमा पुग्नेछ। यस अभियानले सूर्यले कसरी कार्य गर्दछ भन्ने बुझ्न सजिलो हुने वैज्ञानिकहरुले बताएका छन्। 

सूर्यको क्रिया प्रतिक्रियाको असर पृथ्वीका कस्तो पर्छ भन्ने समेत यस अभियानले बताउनेछ।