डीपीएल–२ को फाइनलमा काठमाडौं र धनगढी भिड्दै

सर्वाधिक पुरस्कार राशिको रुस्लान धनगढी प्रिमियर लिग (डीपीएल–२) क्रिकेटको फाइनल प्रवेशको लागि घरेलु टोली टिम चौराह धनगढी र काठमाडौं गोल्डेन्सले मंगलबार प्रतिस्पर्धा गर्दैछन् । पहिलो क्वालिफायरमा धनगढी र काठमाडौं आमनेसामने हुन लागेका हुन् ।

धनगढीको एसएसपी क्रिकेट मैदानमा यी दुई टिमबीचको खेल विहान ९ बजे सुरु हुनेछ । लिगको शीर्ष स्थानमा रहँदै प्लेअफमा पुगेको काठमाडौं अपराजित टिम हो । काठमाडौंले ५ खेलमा ४ मा जित हात पारेको थियो भने १ खेल पानीको कारण रद्द भएको थियो । ज्ञानेन्द्र मल्लको कप्तानीमा रहेको काठमाडौं धनगढीलाई पराजित गर्दै फाइनल प्रवेश गर्ने दाउमा छ । 
यसअघि लिग चरणको पहिलो खेलमा नै काठमाडौंले धनगढीलाई ७ विकेटले पराजित गरेको थियो । आफ्नो दोस्रो खेलमा काठमाडौंले रुपन्देही च्यालेन्जर्सलाई ६३ रनले पराजित गरेको थियो । तेस्रो खेलमा सीवाईसी अतरियालाई काठमाडौंले ११ रनले पराजित गरेको थियो । चौथो खेलमा विराटनगर किंग्सलाई काठमाडौंले ५ विकेटले पराजित गरेको थियो भने पाचौ खेल वर्षाको कारण रद्द भएको थियो ।

यता, धनगढी लिगचरणमा दोस्रो स्थानमा रहँदै पहिलो क्वालिफायर खेल्न लागेको हो । धनगढीले ५ खेलमध्ये ३ मा जित र २ खेलमा हार ब्यहोरेको छ । सोमपाल कामीको कप्तानीमा धनगढी फाइनल प्रवेशका लागि काठमाडौं विरुद्ध मैदानमा उत्रिदैछ । 

लिग चरणको हारको बदला लिने दाउमा पनि धनगढी रहेको छ ।
एलिमिनेटर अन्तर्गत भोलि नै महेन्द्रनगर युनाइटेडले सीवाईसी अतरियासँग प्रतिस्पर्धा गर्दैछ । यी दुई टिमबीचको विजेता दोस्रो क्वालिफायरमा प्रवेश गर्ने छ ।