डीपीएल–२ मा विराटनगरद्वारा टिम चौराहलाई १२८ रनको लक्ष्य

धनगढीमा जारी रुस्लान धनगढी प्रिमियर लिग डीपीएल–२ क्रिकेट अन्तर्गत बिहिबार भएको पहिलो खेलमा विराटनगर किंग्सले टिम चौराह धनगढीलाई जितका लागि १२८ रनको लक्ष्य दिएको छ । विराटनगरले दिएको १२८ रनको लक्ष्यसहित टिम चौरहनले जवाफी ब्याटिङ गरिरहेको छ ।

धनगढीस्थित अञ्चल प्रहरीको क्रिकेट मैदानमा टस हारेर पहिले ब्याटिङ गरेको विराटनगरले १९ ओभर ५ बलमा अलआउट हुँदै १२७ रन बनाउन सक्यो । पारस खड्काको कप्तानीमा रहेको विराटनगरका लागि पवन सर्राफले ४१ तथा अनिल कुमार शाहले २४ रन बनाए ।

यस्तै कप्तान पारस २ रन आउट भए भने भारतीय खेलाडी सुभम कुमटले १८ तथा हङकङका बाबर हायतले १५ रन जोडे । विराटनगरलाई सस्तैमा समेट्न साविकको विजेता समेत रहेको टिम चौराहका लागि सुनील धमलाले ४ विकेट लिए । यस्तै कप्तान सोमपाल कामी र युएईका खेलाडी रोहन मुस्तफाले समान २ – २ विकेट लिए ।

प्रतियोगितामा आज दुवै टोली जित निकाल्दै प्ले अफमा पुग्ने सम्भावना बलियो बनाउन चाहन्छन् । प्रतियोगितामा चौथो खेल खेलिरहेको टिम चौरह तीन खेलमा ४ अंक जोडेर लिगको दोस्रो स्थानमा रहेको छ । यस्तै तेस्रो खेल खेलिरहेको विराटनगर २ अंक जोडेर पाँचौ स्थानमा छ ।