धरान, माघ १६ ।स्वास्थ्य संस्थामा बिरामीको उपचार गर्दा अत्यन्तै लापरवाही गर्ने गरिएका समाचारहरु बारम्बार आइरहने गरेका छन् । बिरामीले भरोसा गर्ने स्वास्थ्यकर्मीहरुकै लापरवाहीका कारण कैयौंको ज्यान थप जोखिममा पर्ने गरेको छ । बिरामीको जीवनमाथि स्वास्थ्य संस्थामा कतिसम्म खेलवाड गरिन्छ भन्ने पछिल्लाे उदाहरण बनेकी छिन् ईटहरी वडा न. ५ बर्ष २७ की आशिका लिम्बु ।
पीडित आशिका लिम्बुलाइ पत्थरीको शल्यकृया गर्न पुस १३ गते बिराट नर्सिङ होममा भर्ना गरिएको थियो । शल्यक्रिया बिराट होमका प्रसिद्ध डा. आर. के. सिंहले गरेका हुन् । शल्यक्रिया गरेको दोस्रो दिन बिरामी गम्भिर भई पुनः चेकजाँच गरियो । त्यसक्रममा आन्द्रामा प्वाल परेको र पुन शल्यक्रिया गर्दा आन्द्रा कुहिएको पाइएको नरसिंङ होमका डाक्टरहरुले बताएको पिडितका पति कृष्ण बहादुर लिम्बुले सञ्चारकर्मीहरुलाई बताए ।
नर्सिङ होममा भर्ना गर्दा गरिएको सबै परीक्षणहरुमा पित्तथैलीमा पत्थरी भएको बताइएको थियो । त्यस बेला गरिएका परीक्षणमा पीडित लाई पत्थरी बाहेक अन्य रोग भएको तथा थप शल्यक्रिया गर्नुपर्ने केही भनिएको थिएन । पित्तथैलीको शल्यक्रिया गरेपछि शल्यक्रिया गर्ने सर्जनको चरम लापरवाहीले अन्द्रामा प्वाल परेपछि अहिले आन्द्रको रोग भएको देखाउन थालेको पीडित पक्षले बताएका छन् ।
पीडितका पति लिम्बुका अनुसार बिरामी पत्निको पुन पेट खोली आन्द्रा समेत सफा गर्ने कार्य भएको उनीहरुलाई बताइयो । विरामीको दोहोर्याएर शल्यक्रिया गरेपछि आफन्तहरुले सोधपुछ गर्दा स्ट्रेश अल्सर भएको बताइएको छ । तर, यस अघि विरामीको आन्द्रा सम्बन्धी कुनै रोग भएको भने उनिहरुले बताएका थिएनन् । तथापी बिरामीको जीवनको सवाल भएकोले बिराट नर्सिङमै उपचार जारी राखेकोमा बिरामीको अवस्था दिनदिनै नाजुक भएकोले रिफर गरेर हाल गम्भिर अवस्थामा वीपी प्रतिष्ठानमा भर्ना गरी आईसियुमा राख्नु परेको पीडित परिवारले जनाएको छ । हाल सम्म उपचार गर्दा २० लाख खर्च भैसकेको पीडितका श्रीमान लिम्बुले बताए ।
पत्रकार सम्मेलन मार्फत पिडितका आफन्तहरुले बिराट नर्सिङ होमको लापरवाहीले पीडित लिम्बुको जीवन गम्भिर जोखिममा पारेकोप्रति आक्रोश ब्यक्त गर्दै त्यस्को क्षतिपूर्ति बिराट नर्सिङ होमले तिर्नु पर्ने माग गरेका छन् ।
