उदयपुर / निर्वाचनको बहानामा विभिन्न ठाउँमा भएका वम विस्फोटमा परि निर्दोष नागरिकको अनाहकमा ज्यान गएकोप्रति सरकारले नालायक पन देखाएको नेकपा एमालेका अध्यक्ष तथा पूर्व प्रधानमन्त्री केपी ओलीले बताएका छन् । गाईघाटस्थित थारुहट रंगशालामा शनिबार संयुक्त वाम गठबन्धन चुनाव प्रचारप्रसार समितिले आयोजना गरेको चुनावीसभालाई सम्बोधन गर्दै सरकारले निर्वाचन ताका सुरक्षा निकाय चुस्त, दुरुस्त बनाउनु पर्ने हो, तर त्यस्तो नभएको बताए । उनले भने, ‘अहिले देशमा चुनाव भाँड्ने नाममा बम पड्किरहेको छ, त्यो बम पड्काउनेहरुले आफैँहरुले नभई कसैको इसारामा बम पड्काउने काम भइरहेकाले बम पड्कदैमा चुनाव रोकिन्न, तीन करोड नेपाली जनताले चाहेको चुनाव दुईरचारवटा बम पड्कदैमा रोकिन्न ।”
निर्दोष जनता तथा उम्मेदवारलाई लक्षित गरी बम नहान्न, तीन करोड नेपालीको चाहना र निर्वाचनमार्फत नयाँ सरकार गठन गरेर देशलाई नयाँ बाटोमा लाने कार्यसँग कसैले पनि खेलबाड नगर्न अध्यक्ष ओलीले चेतावनी दिए । उनले स्थिर सरकारमार्फत देशलाई राजनीतिक संक्रमणबाट मुक्त गर्ने उद्देश्यले एमाले र नेकपा (माओवादी केन्द्र)ले चुनावी एकता गरेको बताउँदै अब बन्ने वाम सरकारले मुलुकलाई सुशासन र स्थिरता दिने दाबी गरे ।
उनले २००७ साल यता देशमा पटक–पटक नेपाली कांग्रेसले सरकार बनाए पनि देश र जनताका लागी कुनै उल्लेखनिय काम गर्न नसकोको आरोप लगाए । उनले भने– ‘अहिलेका प्रधानमन्त्री काँग्रेसका सभापति शेरबहादुर देउवा पिता तुल्य महाराजधिराज भन्दै सत्ता दरबारमा बुझाउने काम गरे,’ उनले भने, ‘यस्तालाई भोट दिएर, बहुमत दिएर तपाँइहरु गर्नु हुन्छ के ?’ विगतमा काँग्रेसलाई दिएको बहुमतले नै दिल्लीमा गएर जनताको खिल्ली उडाएको उदाहरण धेरै भएको ओलीको दावी छ । उनले भने– ‘देशमा लोकतन्त्र गुम्यो भने कांग्रेसकै कारणले गुम्छ ।’ अब देशमा राजा कुनैपनि हालतमा नआउने भएकोले कांग्रेसले गरेको हल्लाको पछि कसैले पनि लाग्न नहुने बताए ।
