१७ साउन, काठमाडौं । त्रि.वि. शिक्षण अस्पताल, महाराजगञ्जमा कार्यरत आवासीय चिकित्सकहरुले बुधबारदेखि अस्पतालको बहिरंग सेवा (ओपीडी) बहिस्कार गर्ने भएका छन् । ओपीडीलगायत पठनपाठन सम्बन्धी कुनै पनि शैक्षिक कार्यक्रममा सरीक नहुने उनीहरुले बताएका छन् ।नेपाल रेजिडेन्ट डाक्टर्स एशोसिएसनका अध्यक्ष डा. कश्यप श्रेष्ठले डा. गोविन्द केसी आमरण अनसनमा बसेको नौ दिन वितिसक्दा पनि सरकार पक्ष गम्भीर नभएकाले भोलिदेखि ओपीडीमा सरीक नहुने बताए ।
उनले भने, ‘डा. केसी आमरण अनसनमा बसेको आज नौ दिन भैसक्यो । तर, राज्य पक्ष गम्भीर देखिएन । साथै डा. केसीको स्वास्थ्य अवस्था समेत गम्भीर हुँदै गएकाले हामी यो कदम चाल्न बाध्य भएका हौं ।’यसअघिका अनसनमा रेजिडेन्ट डाक्टरहरुले डा. केसी अनसन बसेको ४-५ दिनदेखि नै ओपीडी बहिष्कार गर्दै आएका थिए ।यसपटक डा. केसीकै अनुरोधमा विरोधका कार्यक्रमलाई पछि सारेको र बाध्य भएर ओपीडी सेवामा सहभागी हुने निर्णय गरेको उनीहरुले बताएका छन् ।चिकित्सा शिक्षा विधेयक पारित गर्नुपर्ने लगायतका माग राख्दै आमरण अनसन सुरु गरेका डा. केसीको स्वास्थ्य बिग्रिँदै गएको छ ।
