माघ ५, विराटनगर । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले जस्तोसुकै अवस्थामा पनि आफ्नो पार्टी चुनावमा जाने स्पष्ट पारेका छन्। सोमबार बिहान भद्रपुर विमानस्थलमा सञ्चारकर्मीसँग कुरा गर्दै उनले चुनावका लागि शान्ति–सुरक्षाको सुनिश्चितता अनिवार्य रहेको बताए।
“हामी जस्तोसुकै अवस्थामा पनि चुनाव लड्छौँ। तर शान्ति–सुरक्षाको प्रत्याभूति हुनुपर्छ। त्यो अवस्था भने अझै बनेको छैन,” ओलीले भने।
उनले सरकारले शान्ति–सुरक्षाको अवस्था प्रभावकारी रूपमा सुनिश्चित गर्न नसकेको आरोप लगाउँदै विभिन्न किसिमका आपराधिक घटनाहरू अझै भइरहेकाले चिन्ता व्यक्त गरे।
झापा–५ लाई ‘इपिसेन्टर’ भनिएको विषयमा गरिएको प्रश्नमा ओलीले आपत्ति जनाउँदै भने, “केको इपिसेन्टर हुन्छ ? वाहियात कुरा हो। कसले भन्यो यस्तो ?”
ओली आज अपराह्न आफ्नै गृह नगर दमक पुगेर पत्रकार सम्मेलन गर्ने कार्यक्रम रहेको छ। झापा–५ बाट काठमाडौँ महानगरपालिकाका निवर्तमान मेयर बालेन्द्र साह (बालेन)सँग ओलीले चुनावी प्रतिस्पर्धा गर्न सक्ने चर्चा चलिरहेको छ। बालेनले आइतबार मेयर पदबाट राजीनामा दिएका छन्।
