काठमाडौँ, पुस १६ — सरकारले कर्मचारी सरुवामा देखिँदै आएको बेथिति अन्त्य गर्न सफ्टवेयर प्रणालीमार्फत सरुवा व्यवस्थापन गर्ने तयारी गरेको छ। पहुँच र दबाबका आधारमा सरुवा हुने अभ्यास रोक्दै निष्पक्ष, पारदर्शी र तटस्थ प्रणाली लागू गर्न संघीय मामिला तथा सामान्य प्रशासन मन्त्रालयले सरुवा सफ्टवेयर कार्यान्वयनमा ल्याउन लागेको हो।
यसअघि निर्माण भइसकेको सरुवा सफ्टवेयरलाई कर्मचारीका वैयक्तिक विवरण अद्यावधिक गरी प्रयोगमा ल्याइने मन्त्रालयले जनाएको छ। निश्चित अवधि पुगेपछि प्रणालीले नै कर्मचारी सरुवाको सिफारिस गर्ने, कर्मचारी र रिक्त दरबन्दीबारे जानकारी दिने र अवधि नपुग्दै हुने सरुवालाई निरुत्साहित गर्ने व्यवस्था गरिएको छ।
मन्त्रालयका सचिव चन्द्रकला पौडेलका अनुसार सफ्टवेयर सञ्चालनमा आएपछि कर्मचारीको सेवा अवधि, कार्यरत कार्यालय, अनुभव र योग्यता लगायतका विवरण एकै ठाउँमा उपलब्ध हुनेछन्। “प्रणालीले दिएको निर्देशनअनुसार सरुवाका लागि नाम छनोट गर्न सकिनेछ र त्यसैबाट सरुवा प्रणालीको स्थायित्व कायम हुनेछ,” उहाँले भन्नुभयो।
सरुवा व्यवस्थापन सफ्टवेयरलाई राष्ट्रिय किताबखाना (निजामती) को प्रणालीसँग आबद्ध गरी कर्मचारीको योग्यता, विशेष क्षमता, अनुभव र ज्येष्ठताका आधारमा डाटा प्रोसेसिङ गरिनेछ। साथै संगठनको दरबन्दी संरचना, कार्यरत अवधि र रिक्त दरबन्दीको विश्लेषण तथा प्रतिवेदन निकाल्ने सुविधा विकास गरिने मन्त्रालयले जनाएको छ।
प्रशासन शाखाका उपसचिव अनुज घिमिरेले सफ्टवेयरमार्फत सरुवा गर्दा विगतका सबै बेथिति अन्त्य हुने विश्वास व्यक्त गर्नुभयो। “राइट पर्सन इन राइट प्लेस” को सिद्धान्त कार्यान्वयन गर्न मन्त्रालय निरन्तर काम गरिरहेको उहाँको भनाइ छ।
विषयगत मन्त्रालय तथा विभागको कार्यसम्पादन सुधार गर्न मन्त्रालय तथा विभागस्तरीय सरुवा मापदण्ड तयार गरी लागू गरिनेछ। प्रदेश र स्थानीय तहका सरुवासमेत प्रणालीकै आधारमा व्यवस्थापन गर्ने तयारी गरिएको छ।
ऐनसँग नबाझिने मापदण्ड
निजामती सेवा ऐन, नियमावली, स्थानीय सरकार सञ्चालन ऐन र सुशासनसम्बन्धी कानुनसँग नबाझिने गरी सरुवा मापदण्ड प्रस्ताव गरिएको मन्त्रालयले जनाएको छ। यसबाट स्थानीय तहमा खटाइएका प्रमुख प्रशासकीय अधिकृत फिर्ता भई मन्त्रालयको अतिरिक्त समूहमा बस्नुपर्ने परम्पराको अन्त्य हुने अपेक्षा गरिएको छ।
कर्मचारी सरुवाका निवेदन अनलाइनबाट लिइनेछन्। सरुवाका लागि सबै कर्मचारीले अनिवार्य रूपमा वैयक्तिक विवरण (पीआरएस) अद्यावधिक गर्नुपर्नेछ। सरुवा हुन लागेको कर्मचारीले मात्र निवेदन दिन पाउने र औचित्य तथा आवश्यकताको आधारमा मात्र सरुवा गरिने व्यवस्था सफ्टवेयरमा समावेश गरिने मन्त्रालयले जनाएको छ।
फागुन २९, काठमाडौं । नेपालको प्रस्तावमा संयुक्त राष्ट्रसंघको महासभाले अप्रिल १५ लाई ‘अन्तर्राष्ट्रिय आरोग्य दिवस’
फागुन २८ ,काठमाडौं । स्वास्थ्य बीमा बोर्डले उपचारका लागि आउने बीमित बिरामीलाई अस्पताल बाहिरबाट औषधि खरिद
काठमाडौं, फागुन २७ ।इरानको राजधानी तेहरानमा पछिल्ला दिनहरूमा देखिएको ‘कालो वर्षा’ (ब्ल्याक रेन) को घटनाले
तारा निधि पन्त फागुन २६,२०८२ | काठमाडौं हालै सम्पन्न प्रतिनिधिसभा सदस्य निर्वाचनले नेपाली राजनीतिक इतिहासमा
फागुन २६, काठमाडौं । मध्यपूर्वमा बढ्दो सैन्य तनावबीच इरानले अमेरिका विरुद्ध आवश्यक परे शक्तिशाली मिसाइल
काठमाडौं, फागुन २० — राष्ट्रिय सुरक्षा परिषद्ले प्रतिनिधिसभा सदस्य निर्वाचन निष्पक्ष, भयरहित, शान्तिपूर्ण र त्रुटिरहित ढंगबाट सम्पन्न
