चुनावमा उम्मेदवारी दर्ताअघि मन्त्रीबाट राजीनामा दिने संकेत गर्दै कुलमानको भनाइ: नयाँ शक्तिहरू एकताबद्ध हुनुपर्छ

पुस ९, काठमाडौं । ऊर्जामन्त्री कुलमान घिसिङले आफू सक्रिय राजनीतिमा प्रवेश गरिसकेको उल्लेख गर्दै आगामी निर्वाचनमा उम्मेदवारी दर्ता गर्ने समय आउँदा मन्त्री पदबाट राजीनामा दिने संकेत गरेका छन्।

मन्त्रालयमा आयोजित पत्रकार सम्मेलनमा बोल्दै मन्त्री घिसिङले निर्वाचन प्रक्रियामा प्रवेश गर्दा उपयुक्त समयमा आवश्यक निर्णय लिइने बताए। “जुन बेला हामी चुनावमा जान्छौँ, उम्मेदवारी दर्ता गर्ने समय आउँछ। त्यतिबेला उपयुक्त निर्णय गर्छौँ,” उनले भने।

उनले वर्तमान सरकारको मुख्य कार्यभार नै निर्वाचन रहेको उल्लेख गर्दै चुनावमा नयाँ शक्तिहरू एकताबद्ध भएर जानुपर्ने आवश्यकता औँल्याए। “आआफ्नो क्षेत्रबाट जुनसुकै परिस्थितिमा योगदान पुर्‍याउनुपर्छ। सबै आफैंमात्रै सही हुँ भन्ने सोचले अघि बढ्नु हुँदैन,” उनले भने।

नयाँ शक्तिहरूबीच कसरी सहकार्य हुन्छ भन्ने विषयभन्दा पनि सबै मिलेर अघि बढ्नुपर्नेमा आफूहरू एकमत रहेको घिसिङको भनाइ छ। “को–को कसरी मिल्ने भन्ने होइन, नयाँ शक्तिहरू सबै मिल्ने हो,” उनले स्पष्ट पारे।