मंसिर २४, काठमाडौं । जेन–जी आन्दोलनका क्रममा पक्राउ परेकामध्ये ७४ जनालाई जिल्ला अदालतको आदेशअनुसार पुर्पक्षका लागि कारागार चलान गरिएको छ भने ९२ जनालाई हाजिरी जमानीमा रिहा गरिएको छ।
मंगलबार, टीओबी (Tibetan Original Blood) लेखिएको पोसाकसहित प्रदर्शनमा सहभागी थिएञ्जिङ दावा काठमाडौं जिल्ला अदालतले ५ लाख २० हजार रुपैयाँ धरौटीमा रिहा गर्यो। दावा यस प्रकारको कसुरमा धरौटी पाएर छुट्ने पहिलो व्यक्ति होइनन्। यसअघि नै आन्दोलनका क्रममा उदण्डता प्रकरणमा संलग्न ८५ जनाले धरौटीमा रिहा हुने आदेश पाइसकेका छन्।
जिल्ला प्रहरी परिसर, काठमाडौंका अनुसार हाल ४५ जना प्रहरी हिरासतमा रहेका छन्, जबकि ९२ जना दैनिक हाजिरी जमानीमा रिहा भई अनुसन्धानमा रहेका छन्। प्रदर्शनका क्रममा विभिन्न स्थानमा हातहतियार लुटपाट गर्ने तथा अन्य उपद्रवका अधिकांश आरोपी धरौटी, हाजिरी जमानी वा साधारण तारेखमा रिहा भएका छन्। हातहतियारसहित पक्राउ परेकामध्ये १८ जनालाई हाजिरी जमानीमा छाडिएको प्रहरीले जनाएको छ।
आन्दोलनका क्रममा महाराजगञ्ज र कोटेश्वर क्षेत्रका तीन प्रहरीको हत्या भएको थियो। सो घटनामा संलग्न १५ जनाविरुद्ध कर्तव्य ज्यानसम्बन्धी मुद्दा दर्ता गरी सबैलाई पुर्पक्षका लागि जेल चलान गरिएको जिल्ला प्रहरी प्रवक्ता एसपी पवनकुमार भट्टराईले जानकारी दिए।त्यसैगरी, प्रहरीमाथि आक्रमणका क्रममा मतियारको भूमिकामा देखिएका एक जनाविरुद्ध ज्यान मार्ने उद्योगको मुद्दा चलाइएकामा उनी पनि पुर्पक्षका लागि कारागारमा छन्।
हातहतियार लुट्ने, लुकाउने र सार्वजनिक रूपमा प्रदर्शन गर्ने घटनामा संलग्न १६ जनालाई प्रहरीले नियन्त्रणमा लिई पुर्पक्षका लागि कारागार पठाइसकेको छ। डाँका चोरीको मुद्दामा पक्राउ परेका दुई जनाको भद्रकाली प्रहरी परिसरमा अनुसन्धान जारी छ।एसपी भट्टराईका अनुसार हालसम्म अदालतको आदेशअनुसार पुर्पक्षका लागि कारागार चलान गरिएका ७४ जनामध्ये ३७ जना आपराधिक उपद्रव, १६ जना हातहतियार, ३ जना चोरी, १५ जना कर्तव्य ज्यान र १ जना ज्यान मार्ने उद्योगका अभियुक्त छन्।धरौटीमा छुट्नेमध्ये ५३ जना आपराधिक उपद्रव, १२ जना चोरी तथा अन्य अभद्र व्यवहारका मुद्दामा छुटेका छन्।
यससँगै जिल्ला प्रहरी हिरासतमा रहेका ८५ जनामध्ये ५३ जना आपराधिक उपद्रव, ११ हातहतियार, २ चोरी, १ ज्यान मार्ने उद्योग तथा २ जना डाँका चोरीका मुद्दामा अनुसन्धान अवस्थित छन्।दैनिक हाजिर जमानीमा रिहा गरिएका ९२ जनामध्ये ६७ जना आपराधिक उपद्रव, १८ हातहतियार, ४ चोरी, १ संयुक्त उपद्रव–चोरी र २ अभद्र व्यवहारका छन्।सरकारी वकिलको रायका आधारमा आपराधिक उपद्रव तथा हातहतियारका एक–एक जनालाई मुद्दा नचलाइ रिहा गरिएको र अभद्र व्यवहारमा एक जनाले अदालतबाट सफाइ पाएको प्रहरीले जनाएको छ। साथै, ७ जनालाई अदालतले साधारण तारेखमा रिहा गरेको जनाएको छ।
