एक वर्षपछि नायक पल शाह जेल मुक्त,फागुन १५ मा पक्राउ फागुन १५ मै रिहा

१५ फागुन,काठमाडौं । नायक पल शाह एक वर्षपछि जेल मुक्त भएका छन । गत फागुन १५ मा बाल यौन दुरुपयोग अभियोगमा पक्राउ परेका शाह आज फागुन १५ मै रिहा भएका हुन ।

पलको स्वागतका लागि तनहुँ कारागारबाहिर समर्थकको भीड लागेको छ । उनीहरूले पल शाह हाइहाइ, पललाई न्याय भयो भन्दै नाराबाजी गरिरहेका छन् ।

हिजो फागुन १४ गते उच्च अदालत पोखराले जिल्ला अदालत नवलपुरले दिएको सजाय उल्ट्याउँदै नायक शाहलाई सफाइ दिएको थियो। यसैले शाह आज फागुन १५ गते जिल्ला कारागार तनहुँबाट रिहा भएका हुन ।

बलात्कार नभएको तर बाल यौन दुरुपयोग भएको भन्दै नवलपुर जिल्ला अदालतले शाहलाई साढे दुई वर्ष जेल सजाय र पीडितलाई १० लाख क्षतिपूर्ति दिनुपर्ने फैसला गरेको थियो। त्यही मुद्दालाई जिल्ला अदालत तनहुँले भने बलात्कारको अभियोगबाट माघ ३ गते सफाइ नै दिएको थियो।

हिजो फागुन १४ गते उच्च अदालतका न्यायाधीश डिल्लीराज आचार्य र श्रीधराकुमारी पुडासैनीको संयुक्त इजलासले अभियोगमा दावी नपुगेको भन्दै शाहलाई सफाइ दिएको हो ।