यमपञ्चक : प्रहिलो दिन काग तिहार

६ कार्तिक,काठमाडौं । नेपाली हिन्दु धर्मावलम्बीहरुको दोस्रो महान चाड तिहार आजबाट औपचारिक रुपमा शुरु भएको छ । यमपञ्चकको रुपमा मनाने यो पर्वलाई कार्तिक कृष्ण त्रयोदशीदेखि कार्तिक शुक्ल द्धितियासम्म पांच दिन मनाइने सांस्कृतिक चलन रहेको छ ।

यमराजको दूतका रुपमा रहेको कागलाई पुजा गरेर,मीठो-मीठो खान दिएर तिहारको पहिलो दिन काग तिहार मनाइदै छ । प्रत्येक साल कार्तिक कृष्ण त्रयोदशीका दिनमा कगतिहार मनाउने प्रचलन रहेको छ ।

आजको दिन कागलाई दही भात खुवाउने प्रचलन पनि रहेको छ । कागलाई दही भात मीठो लाग्ने भएकोले दही भात खुवाएमा यमराज समक्ष शुभ सन्देश पुर्‍याइदिने भएकोले दही भात खुवाउने चलन परम्परादेखी चलिआएको छ । यमराजले लोकको खबर कागका माध्यमबाट थाहा पाउने भएकाले कागलाई यमदूतका रुपमा मान्ने चलन पनि रहेको छ ।

आजको दिन हनुमानढोकास्थिति कागेश्वरी मन्दिरमा बिशेश पुजा आरधना हुने गर्छ भने काठमाडौंको कागेश्वरी मनोहरा वडा नं १ मा रहेको कागेश्वरी महादेव मन्दिरमा विशेष पूजा आराधना हुने गर्छ।