मोरङ र सुनसरीका बूढी, सेउती, केसलिया, लोहन्द्रा, गछिया, जौलाहा, बक्राहा लगायतका कैयौं खोलाहरुमा जलसतह बढेको जल तथा मौसम विज्ञान विभागले जनाएको छ। बाढीसँगै खोला आसपासमा बसोबास गरिरहेकाहरुमा त्रास बढेको छ। बर्खाका समयमा खोलामा आउने बाढीले मोरङ र सुनसरीमा वर्षेनी ठूलो जनधनको क्षति पुर्याउँदै आएको छ। कयौं मानिस विस्थापित हुने गरेका छन्।
बर्षा जारी रहेको र अझै खोलामा पानीको सतह बढ्नेभन्दै विभागले सबैलाई सतर्कता अपनाउन आग्रह गरेको छ। दुवै जिल्लाका दर्जनौँ स्थानमा ठूलो बर्षा भइरहेको विभागले जनाएको छ। विभागले सुनसरीको इटहरी, तरहरा, मोरङको सुन्दहरैँचा, बेलबारी लेटाङ लगायतका दर्जनौँ स्थानमा छ घण्टाभन्दा बढी निरन्तर ठूलो बर्षा भएको जनाएको छ।
बाढीले क्षति पुर्याउन सक्ने भएकाले खोलानजिक बसोबास गरिरहेकाहरुले उच्च सतर्कता अपनाउन आवश्यक रहेको विभागको भनाइ छ। विभागले खोलाहरुमा पानीको सतह बढेको र सतर्कता अपनाउनुपर्ने विषयमा बिहानै सबैमा सूचित गरिसकेको छ।
बर्षा अझै जारी रहने मौसमविद्ले बताएका छन्। उनीहरुका अनुसार नदी वरपरका बासिन्दाले क्षति हुनबाट बच्न बेलैमा सचेत हुनुपर्ने अवस्था छ। बाढीले पुर्याउनसक्ने क्षतिका बारेमा पूर्वसूचना प्रवाह गर्दै विभागले तटीय तथा डुबान भइरहने क्षेत्रमा सावधानीको विकल्प नभएको जनाएको छ।
मोरङ प्रहरीका निमित्त प्रमुख डीएसपी मञ्जील मुकारुङले बाढी तथा डुबानले पुर्याउन सक्ने क्षतिलाई मध्यनजर गरेर उच्च सतर्कता अपनाउन थालिएको जानकारी दिए। खोलाको छेउछाउमा बसोबास गरिरहेकाहरुलाई सुरक्षित स्थानतर्फ सर्नका लागि आग्रह गरिसकिएको उनको भनाइ छ। बाढी र डुबानले पुर्याउने सम्भावित क्षतिलाई ध्यान दिएर उद्धारका लागि नेपाल प्रहरी लगायतका सुरक्षा निकाय तयारी अवस्थामा रहेको जानकारी मुकारुङले दिए। उनका अनुसार प्रहरीका विभिन्न युनिटले खोला वरपर निगरानी बढाएर त्यहाँको अवस्थाका बारेमा बेला–बेला जानकारी गराइरहेका छन्।
सुनसरी प्रहरी प्रमुख एसपी सञ्जयसिंह थापाले बाढी तथा डुबानको समस्या बढ्नसक्ने भएकाले बेलैमा सबै सचेत भएर सतर्कता अपनाउनुपर्नेमा जोड दिए। उनले बाढीबाट प्रभावित हुनेहरुको उद्धारका लागि सबै तयारी पूरा भइसकेको जानकारी दिए। ‘बाढी र डुबानले ठाउँ–ठाउँमा समस्या उत्पन्न हुन थालेको छ,’ उनले भने, ‘त्यसबाट भएको क्षतिको यकिन गर्ने प्रयास भइरहेको छ।’
त्यस्तै मोरङको रतुवामाई नगरपालिका–३ चौकीघाटस्थित रतुवा खोलामाथिको पक्की पुल बाढीको जोखिममा परेको छ। बाढीले कटान सुरु गरेपछि झापा र मोरङलाई जोड्ने रतुवा खोलामाथिको पुल जोखिममा परेको हो।प्रहरीका अनुसार पुल आसपासमा ६० प्रतिशतजति कटान भइसकेको छ। पुलबाट सवारी आवागमनमा अवरोध पुगेको प्रहरीले जनाएको छ। अन्नपूर्ण पाेस्ट दैनिकबाट
