२३ चैत्र ,उच्च अदालतका छ जना र विभिन्न जिल्लाका १५ जना न्यायाधीशको हिजो काज सरुवा भएको छ । प्राप्त विवरणअनुसार उच्च अदालतका न्यायाधीशहरुमध्ये बालकृष्ण उप्रेतीलाई जनकपुरबाट पोखरा र रेणुका साहलाई बिराटनगरबाट बुटवल पुर्याइएको छ । साह पूर्व प्रधानन्यायाधीश रामकुमार साहकी छोरी हुन् ।

त्यसैगरी न्यायाधीश डालकुमार खड्कालाई उच्च अदालत पोखराबाट जनकपुर,उज्जवल शुक्ललाई जनकपुरबाट पोखरा, नवराज थपलियालाई बुटवलबाट पाटन तथा किरणकुमारी गुप्तालाई जनकपुरबाट बिराटनगर लगिएको छ । न्यायाधीश गुप्ता रौतहट निवासी हुन् ।

काजको लागि न्यायपरिषद्को निर्णय आवश्यक नपर्ने भएकाले प्रधानन्यायाधीश राणाले काज खटाउनुभएको बताइएको छ ।
हिजै विभिन्न १५ जना जिल्ला न्यायाधीशको पनि काज सरुवा भएको छ । जसअनुसार महेन्द्रबहादुर कार्की सिन्धुपाल्चोकबाट सिन्धुली, हरिश्चन्द्र ढुंगाना लमजुङ्गबाट तनहुँ,गिरीराज गौतम सिरहाबाट झापा र तेजप्रसाद पौडेल धनुषाबाट म्याग्दी सरुवामा परेका हुन् ।

त्यसैगरी भरत लम्साललाई कञ्चनपुरबाट मोरङ,कमलप्रसाद पोखरेललाई सुनसरीबाट रुपन्देही, तेजेन्द्र सापकोटालाई कास्कीबाट कपिलवस्तु,परशुराम भट्टराईलाई काठमाडौंबाट धनुषा सरुवा गरिएको छ भने पुनाराम खनाललाई दाङबाट मनाङ लगिएको छ ।
हिजोको सरुवामा जिल्ला न्यायाधीशहरु रमेशकान्त अधिकारी गोरखाबाट सर्लाही, बाबुराम सुवेदी रौतहटबाट कास्की, सन्तोष पराजुली सिन्धुलीबाट सोलुखुम्बु,दिनबन्धु बराल नवलपरासीबाट गोरखा,महेन्द्र काफ्ले सोलुखुम्बुबाट काभ्रे र चन्द्रप्रकाश तिवारी मनाङबाट सिन्धुपाल्चोक पुगेका छन् ।