आइतबारदेखि सुरु हुने कारोबारका लागि इन्स्योरेन्सले १ सय ९ रुपैयाँ ५६ पैसादेखि ३ सय २८ रुपैयाँ ६८ पैसासम्मको ओपनिङ रेञ्ज पाएको छ । यसअनुसार यो शेयरको पहिलो कारोबार १ सय १० रुपैयाँदेखि ३ सय २८ रुपैयाँसम्ममा हुनेछ । यद्यपि अन्यथा नभएको अवस्थामा पहिलो कारोबार माथिल्लो रेञ्ज अर्थात् ३ सय २८ रुपैयाँमै हुनसक्ने सम्भावना छ । 

२ अर्ब चुक्ता पुँजी भएको यो कम्पनीले ३० प्रतिशत बराबरले हुने ६० करोड बराबरको आईपीओ जारी गरेको थियो । त्यसमध्ये ३÷३ करोडको शेयर म्युचुअल फण्ड र कर्मचारीलाई छुट्याएर बाँकी ५४ करोड रुपैयाँ बराबरका ५४ लाख कित्ता शेयर सर्वसाधारणलाई वितरण गरेको थियो । 

हालसम्म सूचीकरण भएका जीवनबीमा कम्पनीमध्ये सबैभन्दा कम मूल्य रिलायन्स लाइफ इन्स्योरेन्सको ६ सय १ रुपैयाँ र सबैभन्दा बढी नेपाल लाइफ इन्स्योरेन्सको २ हजार २ सय ९५ रुपैयाँ छ । रिलायन्स लाइफ नयाँ जीवनबीमा कम्पनी रहेकोले प्रभु लाइफ इन्स्योरेन्सको मूल्य पनि सोही कम्पनीको बजारमूल्यसँग तुलना गर्न मिल्ने बजारका जानकारहरु बताउँछन् । 

रिलायन्स लाइफ इन्स्योरेन्सको भन्दा प्रभु लाइफको पर्फमेन्स कमजोर छ । तर, प्रभु लाइफ प्रभु ग्रुपको ब्रान्डमा भएकोले यसको ब्रान्ड भ्यालु भने रिलायन्सको भन्दा बढी छ । बजारमूल्यमा यी दुई फ्याक्टरले असर गर्दा मूल्य तलमाथि हुनसक्ने जानकारहरु बताउँछन् ।