प्रधानमन्त्रीका प्रेस सल्लाहकार भन्छन् – सरकारलाई घेराबन्दी गरेर स्थिरताविरूद्ध चलखेल भयो

नेकपाका नेतासमेत रहेका प्रधानमन्त्रीका प्रेस सल्लाहकार सूर्य थापाले नेकपाभित्र सरकार ढाल्ने प्रयत्नहरु भइरहेकोतर्फ संकेत गरेका छन् । आज सामाजिक सञ्जाल फेसबुकमा लेख्दै उनले सरकारलाई घेराबन्दी गरेर स्थिरताविरूद्ध चलखेल जारी रहेको बताएका छन् ।

‘हङ्ग पार्लियामेन्ट भयाे भनेर नेपाली जनताले दुई तिहाई संख्यामा नेकपालाई जिताइदिए, नाङ्गो भागबण्डाले त हङ्ग पार्टी पाे भएछ !’, उनले भनेका छन् ।

पार्टी एकता र त्यसपछिका सहमतिहरू उल्लंघन गर्दै षड्यन्त्र र छलछामहरू गर्ने सिलसिला चलिरहेको पनि उनले उल्लेख गरेका छन् ।

‘काेरनाका कारण उत्पन्न राष्ट्रिय संकटविरूद्ध जुधिरहेकाे र सफल ढंगले काम गरिरहेकाे सरकारलाई घेराबन्दी गरेर स्थिरताविरूद्ध जारी चलखेल, नेकपाकाे नाममा ! लज्जाशरणम् !!’, उनले लेखेका छन् ।

थापाले उल्लेख गरेका यी कुराहरुले नेकपाभित्र अहिलेको सरकारप्रति असन्तुष्टि चुलिएको र यो सरकारको विकल्पको खोजी भइरहेको प्रष्ट संकेत गरेको देखिन्छ ।