नेपाल जिम्बावेसँग ५ विकेटले पराजित, खेर गयो सन्दीपको उत्कृष्ट बलिङ

नेपाल जिम्बावेसँग ५ विकेटले पराजित भएको छ । १ सय ३३ रनको लक्ष्य पछ्याएको जिम्बावेले १८.१ ओभरमा ५ विकेट गुमाउँदै पुरा गरेको हो । लेग स्पिनर सन्दीप लामिछानेले उत्कृष्ट प्रर्दशनका बाबजुद पनि अन्तिम समयमा नेपाली बलरहरु चुक्दा नेपाल पराजित हुनु परेको हो ।

जिम्बावेको जितमा रिचमन्ड मुतुम्बामी २८ बलमा ४ छक्का र १ चौका सहित ४० रनमा अविजित रहे । रेयान बर्लले ३६ बलमा २ छक्का र ३ चौकासहित ४१ रनमा अविजित रहे । सन्दीपको घातक बलिङसँगै एक समय १० ओभरमा ६४-५ को कमजोर अवस्थामा पुगेको जिम्बावेलाई यो जोडीले विजयसम्म डोहोर्‍याएको हो । उनीहरुले छैटौं विकेटका लागि ६९ रनको अविजित साझेदारी गरेका हुन् ।

नेपालका लगाि सन्दीप लामिछानेले ३ विकेट लिए । ४ ओभर बलिङ गरेका उनले १५ रन खर्चेर तीन विकेट लिएका हुन् । त्यस्तै पारस खड्काले २ ओभरमा १० रन दिएर १ विकेट लिए । पाँचौ ओभरको पहिलो बलमा ब्रायन चारीलाई दीपेन्द्रले उत्कृष्ट डाइरेक्ट रन आउट गर्दै १९ रनमा पेभिलिएन फर्काएपछि नेपाल बलियो अवस्थामा पुगेको थियो ।

पहिलो डेब्यू खेल खेलेका कुशल मल्लले ३ ओभरमा २८ रन खर्चिए । आजको खेलमा सोमपाल कामी पनि बलिङमा महंगा सावित भए ।

त्यसअघि टस जितेर पहिला ब्याटिङ थालेको नेपालले निर्धारित २० ओभरमा ६ विकेट गुमाउँदै १ सय ३२ रन बनाएको थियो । उपकप्तान दीपेन्द्र सिंह ऐरीले सर्वाधिक ४० रन जोडे । तल्लोक्रमका सोमपाल कामीले १४ बलमा ३ छक्का सहित २५ रनमा अविजित रहे । विकेटकीपर विनोद भण्डारी ११ रनमा नट आउट रहे । नेपालले शनिवार सिंगापुरसँग खेल्नेछ ।