चीनले रसुवा नाकाको पुल बनाउन साढे १५ अर्ब सहयोग गर्ने

साउन ३१, नेपाल र चीनबीच तीन बुँदे समझदारीपत्रमा हस्ताक्षर भएको छ । नेपाल भ्रमणमा रहेका चिनियाँ उपप्रधानमन्त्री वाङ याङ र उपप्रधान एवं संघीय मामिला तथा स्थानीय विकास मन्त्री विजयकुमार गच्छादारको उपस्थितिमा दुर्इ देशका उच्च सरकारी अधिकारीहरूबीच समझदारीपत्रमा हस्ताक्षर भएको हो ।समझदारीपत्रमा नेपालको तर्फबाट अर्थ मन्त्रालयका सचिव शान्तराज सुवेदी र चीनको तर्फबाट त्यहाँको वाणिज्य मन्त्रालयका प्रतिनिधि यु जिअन्ह्वाले हस्ताक्षर गरे ।

समझदारीअनुसार चीनले भूकम्पपछि बन्द रहेको तातोपानी नाका खुलाउन, अरनिको राजमार्गको स्तरोन्नति गर्न र रसुवाको नाकामा पुल निर्माण गर्न साढे १५ अर्ब रूपैयाँ सहयोग गर्नेछ । त्यस्तै, पेट्रोलियम तथा ग्यास अन्वेषण तथा सर्वेक्षणका लागि २ अर्ब रूपैयाँ उपलब्ध गराउने सहमति भएको छ ।नेपालमा चिनियाँ निजी क्षेत्रको लगानी भित्र्याउने बारे पनि सहमति भएको छ । अर्थ मन्त्रालयका सचिव शान्तराज सुवेदीका अनुसार विद्युत्, सडक, कृषि, ट्रान्समिसन लाइन निर्माण अदिलार्इ प्राथमिकताका क्षेत्र तोकेर लगानी विस्तार गरिनेछ ।

तस्बिर : रासस