सर्वोच्चको फैसलाबारे देवी ज्ञवालीसँग अडियो वार्ता – ‘सबैभन्दा ठूला न्यायमूर्ति जनता हुन्’

काठमाडौं। सर्वोच्च अदालतले भरतपुर महानगरपालिका वडा नं. १९ मा पुनः मतदानको फैसला गरेसँगै यहाँका मेयर पदका उम्मेदवार देवी ज्ञवालीले जनता नै सबैभन्दा ठूला न्यायमूर्ति हुने टिप्पणी गरेका छन् । उनले सर्वोच्च अदालतले जे फैसला गरे पनि जनताको अदालतले भने आफ्नो पक्षमा फैसला गर्ने विश्वास व्यक्त गरे । 
नेकपा एमालेको तर्फबाट मेयर पदमा उम्मेदवार बनेका ज्ञवालीले अदालतको फैसला अनपेक्षित भएको बताए । ‘अदालतको यो फैसला एकदमै अनपेक्षित छ’ डिसीनेपालसँग टेलिफोनमा कुराकानी गर्दै ज्ञवालीले भने ‘यस्तो फैसला आउला भन्ने सोचेको पनि थिइनँ ।’ कानुनी राज्यमा अदालतको फैसला सर्वोच्च हुने भन्दै ज्ञवालीले आफू यो फैसला स्वीकार्दै निर्वाचनमा जाने बताए । 
‘कानुनी राज्यमा अदालतको फैसला सर्वोच्च हुने हुँदा यो फैसला मैले सहर्ष स्वीकार गर्छु’ ज्ञवालीले भने ‘यो फैसला सही छ वा गलत भन्ने कुराको फैसला अब भरतपुरवासी जनताले गर्नुहुनेछ ।’ अदालतलाई समेत सत्ता र शक्तिको दुरुपयोग गरी प्रभावित पार्न खोजिएको ज्ञवालीको आरोप थियो । ‘यो सत्ताधारीले आफ्ना सन्तानलाई जिताउन कतिसम्म सत्ता र शक्तिको ददुरुपयोग गर्छन् भन्ने कुराको नमूना हो’ ज्ञवालीले भने ।
दुई महिनासम्म सर्वोच्च अदालतमा विचाराधीन मुद्दाको आज सर्वोच्च अदालतले फैसला गरेको हो । न्यायाधीशद्वय ओमप्रकाश मिश्र र पुरुषेत्तम भण्डारीको संयुक्त इजलासले भरतपुर १९ मा पुनः मतदानको फैसला गरेको हो । यहाँ ज्ञवालीविरुद्ध निकटतम प्रतिद्वन्द्वी माओवादी केन्द्रकी रेणु दाहाल छिन् । नेपाली कांग्रेस र माओवादी केन्द्रकी साझा उम्मेदवार दाहाल माओवादी केन्द्र अध्यक्ष पुष्पकमल दाहालकी छोरी हुन् । यहाँ निर्वाचन र मतगणना भइरहँदा रेणुका पिता प्रचण्ड देशका बहालवाला प्रधानमन्त्री थिए । अहिले पनि उनको पार्टी सत्तामा छ भने ज्ञवालीको पार्टी एमाले प्रतिपक्षमा छ । 

देवी ज्ञवालीसँगको अडियो कुराकानी सुन्नुहोस्