आजका पत्रपत्रिकाका फ्रन्टपेज

१९ असार, काठमाडौं । स्थानीय तह दोस्रो चरण निर्वाचनको परिणाम धमाधम सार्वजनिक भइरहेका छन् । अहिलेसम्म बाहिरिएको निर्वाचन परिणाममा नेकपा एमाले अगाडि देखिएको छ । आज प्रकाशित सबैजसो दैनिक पत्रिकाहरुले निर्वाचनमा भएको हार–जितको लेखाजोखा गरेका छन् ।

प्रधानमन्त्री शेरबहादुर देउवाले मन्त्रिपरिषद् विस्तार गर्ने तयारी गरेको विषयलाई पनि पत्रपत्रिकाहरुले लेखेका छन् । भारतीय बाँधका कारण सप्तरीमा भएको डुबान पनि पत्रिकाको प्राथमिकतामा परेको छ ।

नयाँ पत्रिका दैनिकले ६ वर्षमा २३ पटक पेट्रोलियममा अवरोध भएको लेखेको छ । देउवाले यो साताभित्रै मन्त्रिपरिषद् विस्तार गर्ने गरी तयारी गरेको र माओवादी केन्द्रले मन्त्री टुंग्याएको खबर नयाँ पत्रिकामा छ ।

‘भारतीय बाँधले सप्तरीमा डुबान’ शीर्षक दिएर मुख्य खबर लेखेको नागरिक दैनिकले एमालेको अग्रता कायमै रहेकोदेखि नारायणगढ –मुग्लिन सडक खण्डको जोखिम बढेको सम्मको खबर लेखेको छ ।

कान्तिपुर दैनिकले देशमा विभिन्न स्थानमा बाढीपहिरोपछि भएको क्षतिलाई मुख्य खबर बनाएको छ । ‘राजमार्ग हो कि सास्तीको बाटो’ शीर्षक दिएर कान्तिपुरले नारायणगढ़–मुग्लिन सडकखण्डबारे लेखेको छ ।

अन्नपूर्ण पोस्ट दैनिकले माओवादी हारबारे लेखाजोखा गरेको छ । गोरखापत्र दैनिकमा निर्वाचन परिणामलगायत खबर छ ।