अष्ट्रेलियाका क्रिकेटरले भनेः कोहलीलाई स्टम्पले हान्न मन थियो

अष्ट्रेलियाको क्रिकेट टिमका पूर्व ओपनर एड कोवनले कुनै बेला भारतीय कप्तान बिराट कोहलीलाई स्टम्प उखलेर हान्न मन लागेको बताएका छन् ।
कोहलीले अष्ट्रेलियाका खेलाडीसँग गरेको झगडाको प्रसंगमा उनले यस्तो बताएका हुन् । हालै सम्पन्न गावस्कर-बोर्डर ट्रफीमा भारतले अष्ट्रेलियालाई २-१ ले हराएको थियो । यस दौरान कोहलीले अष्ट्रेलियाका कप्तान स्टिभ स्मिथसँग झगडा गरेका थिए ।

फक्स स्पोर्टले कोवनलाई उदृत गर्दै भनेको छ, ‘एउटा सिरिजका क्रममा उनले यस्तो कुरा गरे जुन साह्रै रिसउठ्दो थियो । तै पनि म चुप रहेँ ।’

कोवन अगाडि भन्छन्, ‘अनुवादमा भएको गल्तिलाई मैले मुद्दा बनाएको थिइनँ तर उनले साँच्चै खराब कुरा गरेका थिए । यो एउटा व्यक्तिगत र संवेदनशील कुरा थियो । मलाई लागेको थियो कि उनलाई स्टम्प उखलेर हिर्काइदिउँ । तर, म चुप रहेँ । अन्ततः अम्पायरले नै आएर उनलाई सचेत गराए । पछि कोहलीले मसँग माफी पनि मागे ।’

कोवनले अष्ट्रेलियाबाट १८ टेष्ट म्याच खेलेका छन् र १ हजार १ रन बनाएका छन् । उनको उच्चतम स्कोर एक सय ३६ रहेको छ ।

कोवल कोहलीका प्रशंसक पनि हुन् । उनी भन्छन्, ‘म उनको खेलको प्रशंसा गर्छु । तर उनको व्यवहार ठीक छैन ।’