सरकारमा रहेको राप्रपा नेपालले सरकार विरुद्ध नै आन्दोलन गर्ने, यस्तो छ आन्दोलनको कार्यक्रम

काठमाडौं, ५ चैत्र । नेपालको संविधानको विरुद्धमा पार्टीको विधानमा ‘राजसंस्था र हिन्दुराष्ट’ राखेको भन्दै निर्वाचन आयोगले हटाइदिएपछि राप्रपा नेपालले आन्दोलनको कार्यक्रम सार्वजनिक गरेको छ ।

शनिबार बसेको आकस्मिक बैठकले तत्काल आन्दोलनमा जाने निर्णय गरेको पार्टी केन्द्रीय सदस्य मोहन श्रेष्ठले बताए ।

निर्वाचन आयोगले पार्टीका विधान विपरित निर्णय गरिदिएको भन्दै आन्दोलनको पाँच बुँधे संघर्षको कार्यक्रम समेत उनीहरुले घोषणा गरेका छन् । घोषित आन्दोलनको कार्यक्रम अनुसार चैत्र ७ गते निर्णय पुर्नविचारको लागि देश भर रहेका सदरमुकाममा रहेका आयोगको कार्याललयमा ज्ञापन पत्र बुझाउने र एक घण्टा धर्ना गर्ने, त्यस्तै सोही दिन निर्वाचन आयोगको केन्द्रीय कार्यालय बहादुर भवन अगाडी एक घण्टा धर्ना दिने कार्यक्रम रहेको छ ।

त्यस्तै पार्टीको संवैधानिक अधिकार खोसिएको भन्दै कानुनी उपचारको लागि समेत तयारी गर्ने निर्णय राप्रपाले गरेको छ । चैतको तेस्रो हप्ताबाट भने हिन्दुराष्ट्र पुनस्थापनाका लागि देशव्यापी सडक संघर्ष गर्ने, धर्मनिरपेक्षताको खारेजी र हिन्दुराष्ट्र पुनस्थापनाको लागि तत्काल संसदमा संशोधन प्रस्ताव पेश तथा सदनमा शसक्त आवाज उठाउँने निर्णय आजको बैठकले गरेको छ ।
पार्टी अध्यक्ष कमल थापाको नेतृत्वमा राप्रपा सरकारमा समेत सामेल छ ।