प्रम ओलीले त्यसबेला जनताका लागि आफूहरुले पनि संघर्ष गरेको र ४० वर्षअघि शान्तिपूर्ण राजनीतिको बाटो अंगिकार गरेको स्मरण गर्दै आज (शुक्रवार) नेपालमा शान्तिको नयाँ युग सुरु भएको बताएका छन। प्रम ओलीले शान्तिको भूमि नेपालमा अब वास्तविक शान्ति भएको बताउदै विप्लव समूहसँग भएको सम्झौता ‘फोर्स ल्याण्डिङ’ वा ‘क्र्यास ल्याण्डिङ’ नभइ ‘सेफ ल्याण्डिङ’ भएको बताए ।
प्रधानमन्त्री ओलीले यो सम्झौता रातारात भएको नभइ लामो समयको छलफलपछि र प्रयास पछि सम्भव भएको बताएका थिए ।
सरकार र विप्लव नेतृत्वको नेकपाबीच यसअघि तीन बुँदे सहमति भएको थियो । सहमतिमा सरकार र विप्लव समूहबीच राजनीतिक विषयहरुको समाधान संवादको माध्यमबाट गर्ने, विप्लव समूहका सम्पूर्ण राजनीतिक क्रियाकलापहरू शान्तिपूर्ण रूपमा सञ्चालन गर्ने र सरकारका तर्फबाट लगाइएको विप्लव नेतृत्वको प्रतिबन्ध हटाउने, राजनीतिक बन्दीको रिहाइ गर्ने र मुद्दा खारेज गर्ने विषयहरू समेटिएका छन् ।
सहमतिपत्रमा भनिएको छ, ‘दुवै पक्ष नेपाल सरकार तथा नेपाल कम्युनिस्ट पार्टी देशको राजनीतिक समस्याहरू वार्ता तथा संवादबाट समाधान गर्न सहमत भएका छौँ । आफ्ना सबै राजनीतिक क्रियाकलापहरू शान्तिपूर्ण रूपमा सञ्चालन गर्न सहमत भएको छ । नेपाल सरकार नेपाल कम्युनिस्ट पार्टीमाथि लगाइएको प्रतिबन्ध हटाउन, कारागारमा भएका नेता तथा कार्यकर्ताको रिहा गर्दै सम्पूर्ण मुद्दा खारेज गर्न सहमत भएको छ । ’
हस्ताक्षर समारोहमा कार्यक्रम संचालन गर्दै सरकारका वार्ता टोलीका सदस्य एवं प्रधानमन्त्रीका विदेश सल्लाहाकार राजन भट्टराईले विगत एक वर्षदेखिको निरन्तरको प्रयासपछि वार्ता निष्कर्षमा पुगेको स्पष्ट पारेका थिए । हस्ताक्षर समारोहमा स्वदेशी तथा विदेशी सञ्चारकर्मीको बाक्लो उपस्थिति रहेको थियो ।