काठमाडौं, ३ साउन । नेपाल स्वास्थ्यकर्मी तथा कर्मचारी यूनियनले अमुक लुटेराहरुको स्वार्थपूर्तिका लागि डा. गोविन्द केसीले पटक–पटक अनसन बसेर सार्वसाधारणलाई हैरानी दिएको आरोप लगाएको छ । यूनियनले एक प्रेस विज्ञप्ति जारी गर्दै अध्यादेशमार्फत ल्याइएको चिकित्सा शिक्षा विधेयक संसदबाट हुबहु पारित गर्न माग गरेकाे छ । यूनियनले अनसनरत प्रा.डा.गोविन्द केसीको समर्थन गर्दै नेपाल चिकित्सा संघले देशभरका स्वास्थ्य संस्था बन्द गर्न गरेको आह्वानप्रति खेद व्यक्त गरेको छ ।

यूनियनले सबै स्वास्थ्यकर्मी तथा कर्मचारीहरूलाई आफ्नो कार्यक्षेत्रमा निष्ठापूर्वक लागि मानवीय संवेदना तथा लाखौँ बिरामीको जीवनरक्षा गरी आफ्नो कर्तव्य निर्वाह गर्न र नेपाल चिकित्सक संघको बन्द डटेर अवज्ञा गर्नसमेत सबै स्वास्थ्यकर्मीलाई आग्रह गरेको छ ।

‘नेपाल चिकित्सक संघले गरेको बन्द, देश र जनताका लागि होइन, थिएन र छैन । सरकारी अस्पताल बन्द गर्नुको अर्थ निजी क्लिनिकमा लुट भन्ने मात्र हो । डा. गोविन्द केसीले उठाएका मागहरू र स्वास्थ्य क्षेत्रका विकृतिहरूलाई राज्यले बेलैमा दीर्घकालीन समाधानमा जानुको विकल्प छैन । बारम्बारका अनसन र गैरकानुनी बन्दले पुरा नहुने सम्झौता गरेर स्वास्थ्य क्षेत्रलाई सेवाको नाममा लुट मच्चाउन कसैलाई छुट दिइनु हुँदैन ।’ यूनियनका अध्यक्ष चन्द्र थापाद्धारा हस्ताक्षरित विज्ञप्तिमा भनिएको छ ।

यूनियनले अमुक लुटेराहरूको स्वार्थ सिद्ध गर्न एकजना डाक्टरलाई मोहरा बनाएर विधि र कानूनको पालना एवम् सम्मान हैन स्वास्थ्य क्षेत्रका विसङ्गतीलाई यथावत राख्ने उद्देश्यले केन्द्रित रहेको आरोप लगाएको छ । अनसन र त्यसलाई बाहना बनाएर बिरामीको जीवनसँग खेल्ने लुटेरा र मेडिकल माफियाहरूको संजाल नेपाल चिकित्सक संघ हाे भन्दै यूनियनले खुलेरै विरोध गरेको छ ।

उसले नेपाल चिकित्सक संघले आन्दोलन गर्नुभन्दा पनि मध्यस्थताको भूमिका निर्वाह गरेर स्वास्थ्यजस्तो संवेदनशील क्षेत्रमा गैरकानुनी ढङ्गले बन्द हडताल नगर्न पनि भनेको छ ।