ओली–लेखकको बन्दीप्रत्यक्षीकरण रिटमा आज सुनुवाइ हुने

काठमाडौँ, चैत १६ । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक पक्राउविरुद्ध सर्वोच्च अदालतमा दायर बन्दीप्रत्यक्षीकरण रिटमाथि आज सुनुवाइ हुने भएको छ।

एमाले अध्यक्षसमेत रहेका ओलीकी पत्नी राधिका शाक्यले आफूहरूलाई गैरकानुनी रूपमा थुनामा राखिएको दाबी गर्दै थुनामुक्त गर्न मागसहित हिजो सर्वोच्चमा रिट दायर गर्नुभएको हो। अदालतका प्रवक्ता अर्जुनप्रसाद कोइरालाका अनुसार उक्त रिटमा आजै सुनुवाइ तोकिएको छ।

यसैगरी, पूर्वगृहमन्त्री लेखकलाई गैरकानुनी रूपमा थुनामा राखिएको जिकिर गर्दै उनकी पत्नी यशोदा लेखकले दायर गरेको बन्दीप्रत्यक्षीकरण रिटको सुनुवाइ पनि आजै हुने जनाइएको छ।

शनिबार पक्राउ परेका ओली र लेखकलाई अनुसन्धानका लागि पाँच दिन थुनामा राख्न जिल्ला अदालत काठमाडौँले अनुमति दिएको छ।

स्वास्थ्य समस्याका कारण ओली हाल शिक्षण अस्पताल महाराजगन्जमा उपचाररत छन्। उनलाई हिजो अदालतमा भर्चुअल माध्यमबाट उपस्थित गराइएको थियो। नेता लेखक भने स्वयम् अदालतमा उपस्थित भएका थिए। उनलाई महाराजगन्जस्थित प्रहरीको दुई नम्बर गणमा राखिएको छ।