“निष्ठा र इमान्दारिताको राजनीति गर्नेछु”: रीमा विश्वकर्मा

मंसिर १७, काठमाडौँ — उज्यालो नेपाल पार्टीकी केन्द्रीय सदस्य रीमा विश्वकर्माले निष्ठा, इमान्दारिता र परिवर्तनमुखी राजनीति आफ्नो प्रमुख प्रतिवद्धता रहेको बताएकी छन्। कमलादीस्थित नेपाल प्रज्ञा प्रतिष्ठानमा बुधबार आयोजित पार्टी घोषणा कार्यक्रममा बोल्दै उनले आफू प्रतिशोध होइन, देश परिवर्तनको राजनीतिमा लाग्न आएको स्पष्ट गरिन्।

“हामी प्रतिशोधको होइन, परिवर्तनको राजनीति गर्न आएका छौँ,” विश्वकर्माले भनिन्। देशप्रतिको जिम्मेवारीबोध र केही योगदान गर्ने चाहनाले आफू राजनीतिमा कदम राखेको उनले उल्लेख गरिन्। अवसर र जिम्मेवारी दिएकोमा पार्टीप्रति आभार व्यक्त गर्दै उनले उज्यालो नेपाल पार्टीलाई सामान्य दलका रूपमा नभई ‘देशको पार्टी’ का रूपमा अगाडि बढाउने प्रतिबद्धता व्यक्त गरिन्।

गत भदौ २३ र २४ मा भएको जेन–जी आन्दोलनका घटनाले जो–कोहीलाई पनि देश निर्माणमा सक्रिय हुन प्रेरित गर्ने बताउँदै उनले राजनीतिक यात्रामा आफू पूर्णतः जिम्मेवार र निष्ठावान रहने आश्वासन दिइन्।

अभिनेत्री र टेलिभिजन रियालिटीशोकी सञ्चालिका समेत रहेकी विश्वकर्मा केही दिनअघि ऊर्जा तथा पूर्वाधार क्षेत्रमा सक्रिय कुलमान घिसिङको समर्थनमा गठन गरिएको ‘उज्यालो नेपाल पार्टी’ को केन्द्रीय सदस्य बनेकी हुन्।