काठमाडौँ, १ फागुन । सर्वोच्च अदालत परिसरमा प्रदर्शन गर्न खोज्ने कानुन व्यवसायी र प्रहरीबीच झडप भएको छ ।
प्रधानन्यायाधीश चोलेन्द्र शम्सेर जबराको राजीनामा माग्दै पुनः भौतिक उपस्थितिमा प्रदर्शनमा उत्रिएका कानुन व्यवसायीहरुलाई प्रहरीले रोक्न खोज्दा झडप भएको हो । उल्लेख्य संख्यामा प्रहरी र दंगा नियन्त्रण टोलीलाई सर्वोच्च परिसरमा परिचालन गरिएको छ ।
बार एशोसिएसनको भवनतर्फबाट सर्वोच्च प्रवेश गर्न खोज्दा प्रहरीले ढोकैमा रोकेको थियो । त्यसपछि कानुन व्यवसायीहरु मूल सडकमा निस्किएर सर्वोच्चको मूल गेट तर्फ लागेका थिए । प्रहरीले मूल गेटमा पनि रोकेपछि उनीहरुले सडकमा प्रदर्शन गरिरहेका छन् । कानुन व्यवसायीहरुले प्रधानन्यायाधीशको राजीनामा माग्दै नारा लगाइरहेका छन् ।
यता कांग्रेस, माओवादी तथा नेकपा एसका सांसदहरुले भने आज नै प्रधानन्यायाधिक चोलेन्द्र शमशेर जवराविरुद्ध महाअभियोग समेत दर्ता गरिसकेका छन् ।
