काठमाडौँ, ८ मंसिर । नेकपा एमालेले आसन्न १०औं महाधिवेशनका लागि प्रतिनिधिको संख्या २३ सय २७ पुर्याएको छ ।
मंगलबार बसेको स्थायी कमिटी बैठकले प्रतिनिधिको संख्या बढाएर २३ सय २७ पुर्याउने निर्णय गरेको हो । यसअघि १ हजार ९ सय ९९ जना महाधिवेशनमा प्रतिनिधि हुने बताइएको थियो । तर मंगलबारको बैठकले १०३ जना थप प्रतिनिधि मनोनीत गर्ने निर्णय गरेको सचिव योगेश भट्टराईले बताउनुभयो ।
उहाँका अनुसार हालसम्म केन्द्रीय कमिटी र केन्द्रीय निकायबाट हुने पदेन प्रतिनिधिको संख्या २ सय ३८ जना, निर्वाचित प्रतिनिधि १ हजार ८ सय ८९ जना रहेका छन् । हालसम्म ६२ महिलासहित १ सय ९५ जना दलित र ५ सय ७६ जना महिला प्रतिनिधि हाधिवेशनमा सहभागी हुने भट्टराईले बताउनुभयो । त्यसैगरी महोत्तरी, रौतहट, प्रदेश नम्बर २ मजदुर प्रतिनिधि र भूतपूर्व सैनिक गरी ६७ जना प्रतिनिधि चयन हुन बाँकी छ ।
