रमन कन्स्ट्रक्सनका प्रोजेक्ट म्यानेजर श्यामचन्द्र श्रेष्ठले लकडाउनका कारण काम प्रभावित भएको र संग्रहालयको साइट भर्खरै प्राप्त भएकाले तोकिएको समयमा काम सम्पन्न नहुँदा समय थप्नुपरेको बताए। उनका अनुसार हालसम्म धरहराको १६ तला ढलान भइसकेको छ। धरहराको अन्डरग्राउन्डमा रहेको डबल बेसमेन्टको काम सम्पन्न भई ट्रिपल बेसमेन्टको काम भइरहेको छ, उनले भने, जसमा चार सयवटा साना गाडी र सात सय वटा मोटरसाइकल पार्किङ गर्न मिल्नेछ।
कोरोना भाइरस संक्रमण रोकथाम र नियन्त्रणका लागि सरकारले गरेको लकडाउनका कारण कामको रफ्तारमा असर पर्दा समयमा पुननिर्माण सम्पन्न गर्न नसकिएको हो। २२ तलाको योजना रहेको धरहराको कुल लागत भ्याटसहित तीन अर्ब ४५ करोड रुपैयाँ छ। धरहराको कुल क्षेत्रफल ४२.२ रोपनी रहेको छ। नागरिक दैनिकबाट
