देशभर चिसो बढ्योः उच्च भेगमा भारी हिमपातको संभावना !

काठमाडौं, २६ मंसिर । नेपालको पश्चिमी भू-भागबाट न्यून चापीय प्रणाली प्रवेश गरेकाले देशभर बिहीबारदेखि शनिबारसम्म चिसो बढ्ने मौसम पूर्वानुमान महाशाखाले जनाएको छ ।

महाशाखाका अनुसार हिजो बुधबार साँझदेखि नेपालको पश्चिमी भू-भागबाट न्यून चापीय प्रणाली प्रवेश गरेको छ। यस प्रणालीका कारण नेपालका पश्चिमी उच्च पहाडी र हिमाली भू-भागमा भारी हिमपात हुने संभावना रहेको छ ।

न्यून चापीय प्रणाली अझै सशक्त भई देशका मध्य र पूर्वका उच्च पहाडी र हिमाली भू-भागमा समेत हल्का देखि मध्यम हिमपातको सम्भावना रहेको महाशाखाले जानकारी दिएको छ ।

त्यस्तै उक्त प्रणालीका कारण देशभर बदली भई अधिकतम र न्युनतम तापक्रममा गिरावट आउने  र मुलुकभर चिसो बढ्ने महाशाखाले जनाएको छ । साथै यस प्रणालीका कारण देशका पश्चिमी भू-भागका धेरै स्थानहरूमा र मध्य र पूर्वी भू-भागका केही स्थानहरूमा हल्का वर्षाको सम्भावना समेत रहेको छ।

बुधबार बाट शुरू भएको यो मौसमी प्रणाली शनिबार सम्ममा अन्त्य हुने देखिन्छ।

उच्च पहाडी र हिमाली भेगमा भारी हिमपात हुन सक्ने र पहाडी भेगमा वर्षा हुने संभावना छ । तापक्रममा गिरावट आउने संभावना रहेकाले सतर्कता अपनाउन महाशाखाले सबैलाई अनुरोध समेत गरेको छ ।

यता हिमपात हुँदा हुम्लाको जनजीवन प्रभावित भएको छ ।

पश्चिमी वायु प्रणालीको प्रभावले हुम्लासहित कर्णालीका उच्च हिमाली क्षेत्रमा आज बिहान ६ बजेबाट हिमपात शुरु हुँदा अन्तरजिल्ला पुग्ने हवाई उडान बिहानबाटै प्रभावित भएको छ ।

हिमपातले गर्दा जिल्लाको एकमात्रै यातायात सेवा हवाइजहाज उडान बन्द रहेको सिमकोट विमानस्थल स्रोतले जानकारी दिएको छ ।

नेपालगञ्ज सुर्खेतबाट बिहान ७ बजेदेखि हुम्लामा उडान गर्दै आएको तारा, सीता, समिट एयरलाइन्सको उडान प्रभावित भएको छ । हवाई यातायात बन्द हुँदा अत्यावश्यक कामका लागि बाहिर जाने स्थानीयवासी समस्यामा परेका छन् ।