पर्वत, २६ भदौ । गण्डकी प्रदेशका मुख्यमन्त्री पृथ्वीसुब्बा गुरुङले सङ्घीय सरकारसँग अधिकार माग्नका लागि मुख्यमन्त्रीहरु एकजुट भएको बताएका छन् ।

प्रेस चौतारी र प्रेस सेन्टर नेपाल पर्वतले सोमबार जिल्लामा आयोजना गरेको पत्रकार सम्मेलनमा मुख्यमन्त्री गुरुङले उक्त कुरा बताएका हुन् । उनले भने, ‘पोखरामा हालै भएको ७ वटै प्रदेशका मुख्यमन्त्रीको भेला सङ्घीय सरकारविरुद्ध मोर्चाबन्दी गर्न नभई अधिकारको खोजीका लागि भएको हो ।’

मुख्यमन्त्री गुरुङले भेला भएर अधिकारको खोजी गर्दा त्यसलाई मोर्चाबन्दी भएको भन्नु उपयुक्त नहुने धारणा राखे । उनले प्रदेश सकारका लागि आवश्यक कानून, कर्मचारीलगायतका विषय सङ्घीय सरकारले अहिलेसम्म दिन नसकेका कारण हामीलाई काम गर्न कठिनाइ भएको बताए ।

‘प्रदेशलाई दिनुपर्ने अधिकार र संरचनाहरु छिटो देउ, काम गर्ने वातावरण बनाउनुपर्‍यो भन्दा कसरी मोर्चाबन्दी हुन्छ’, उनको प्रश्न थियो, ‘आवश्यक कर्मचारी र संरचनाको अभावमा प्रदेश सरकारले काम गर्न नसकेको र यस कार्यमा सङ्घीय सरकार अनुदार बनिदिदाँ समस्या झन जटिल बनेको गएको छ ।’

मुख्यमन्त्री गुरुङले प्रदेशका लागि आवश्यक कर्मचारी पठाउने, आर्थिक स्रोतको बाँडफाँट गर्ने र प्रदेशका लागि अधिकार प्रत्यायोजन गर्ने सङ्घीय कानून संशोधनमा ढिलाइ गरेर सङ्घीय सरकार अनुदार बनेको धारणा व्यक्त गरे ।

प्रदेश सरकारले काम गर्न थालेको पाँच महिना मात्रै भएकाले अहिले नै परिणाम खोज्नु अनुचित भएको उल्लेख गर्दै उहाँले स्रोतसाधन परिचालन गरेर अधिकतम आम्दानी गर्दा सङ्घीयता बलियो हुने धारणा राखे ।

मुख्यमन्त्री गुरुङले करको हाउगुजी धेरै बढेकाले लिनै पर्ने शीर्षकमा मात्र कर सङ्कलन गर्न स्थानीय तहलाई आग्रह पनि गरे । रासस