सर्बोच्च अदालतको प्रधानन्यायाधीशमा मिश्र अनुमोदित

काठमाडौं, भदौ २५ । प्रधानन्यायाधीशमा ओमप्रकाश मिश्र अनुमोदित भएका छन् । २०७५ भदौ २५ गते सोमबार बिहान बसेको संसदीय सुनुवाइ समितिको बैठकले मिश्रको नाम अनुमोदन गरेको हो ।मिश्रले उनीविरुद्ध परेका उजुरीको जवाफ र कार्ययोजना प्रस्तुत गरेपछि समितिले उनको नाम अनुमोदन गर्ने निर्णय गरेको हो ।

योसँगै ६ महिनादेखि नेतृत्वविहीन सर्वोच्च अदालतले नेतृत्व पाउने मार्गप्रशस्त भएको छ । गत फागुन ३० गते तत्कालीन प्रधानन्यायाधीश गोपाल पराजुली पदमुक्त भएपछि सर्वोच्च नेतृत्वविहीन रहँदै आएको छ । कायममुकायमको भरमा चलिरहेको छ  ।संसद्को कार्यसञ्चालन नियमावली नबन्दा प्रधानन्यायाधीश नियुक्त अवरुद्ध बनेको थियो । नियमावली बनेपछि बसेको संवैधानिक परिषद्को बैठकले कायममुकामय प्रधानन्यायाधीश दीपकराज जोशीको नाम सिफरिस गरेको थियो । तर नेपालको इतिहासमै संसदीय सुनुवाइबाट उनी अस्वीकृत भए ।

जोशी अस्वीकृतपछि परिषद्ले उनीपछिको वरीयतामा रहेका मिश्रलाई प्रधानन्यायाधीश बन्न सिफारिस गरेको थियो । जोशीको नाम अस्वीकृत गरेको समितिले मिश्रको नाम भने अनुमोदन गरेको छ ।अब राष्ट्रपतिले प्रधानन्यायाधीशमा अनुमोदित मिश्रको नाम स्वीकृत गरेपछि उनले पद तथा गोपनीयताको शपथ लिनेछन् ।