सरकारका कुनै मन्त्री अहिले परिवर्तन हुँदैनन् : प्रधानमन्त्री

प्रधानमन्त्री केपी शर्मा ओलीले वर्तमान सरकारका मन्त्रीहरुले राम्रो काम गरिरहेको बताउँदै अहिले कोही पनि मन्त्री परिवर्तन नहुने बताएका छन् । जिल्ला समन्वय समिति महासंघ नेपालको प्रथम राष्ट्रिय सम्मेलनको उद्घाटन गर्दै प्रधानमन्त्री ओलीले यस्तो बताएका हुन् ।

“सबै मन्त्रीहरुले राम्रो काम गरिरहेका छन् । मन्त्रीमण्डल आजै परिवर्तन हुँदैछ, भोलि नै परिवर्तन हुँदैछ भन्ने हल्लाहरु हुन्,” प्रधानमन्त्री ओलीले भने, “मन्त्रीमण्डल अहिले परिवर्तन हुँदैन ।” प्रधानमन्त्री ओलीले नेपालले अब चीनसँग आवश्यक हुने नाका प्रयोग गर्न सक्ने बताए ।

“नेपाल चीन प्रोटोकल सहमतिमा टुंगिएको छ,” प्रधानमन्त्री ओलीले भने, “अब नेपालले चाहिने जति नाका,चाहिने जति सडक प्रयोग गर्न पाउने भयो । यो असाधारण खुसीको कुरा हो ।” प्रधानमन्त्री ओलीले राजनीतिक अधिकारको लडाईं सकिएकोले अब विकास र समृद्धिको यात्रामा सबै एकतावद्ध भएर लाग्नुपर्ने बताए ।

प्रधानमन्त्री ओलीले सरकार नयाँ संकल्पका साथ अघि बढेको पनि स्पष्ट पारे । “मुलुकलाई विखण्डनतर्फ लैजाने प्रयास भएका छन् । मुलुकमा वितण्डा मच्चाउन खोजिएको छ,” प्रधानमन्त्री ओलीले भने, “हामीले विविधताका बीचमा उत्तिकै समानता खोज्नुपर्दछ । गलत तत्वहरुको चलखेललाई रोक्नुपर्दछ ।”