तीन दिन देशभर वर्षा हुने

 आज देशभर बदली हुने तथा ३ दिन अधिकांश स्थानहरुमा हल्कादेखि मध्यम खालको वर्षा हुने मौसम पूर्वानुमान महाशाखाले जनाएको छ । विभागले एक सूचना जारी गर्दै ३ दिन देशभरको मौसम बदली हुने अनुमान गरेको हो ।

महाशाखाका अनुसार, देशको मध्य र पश्चिमी क्षेत्रका केही स्थानहरुमा भने आज भारी वर्षाको सम्भावना छ ।

रातिको समयमा पनि देशभरि नै बदली रही अधिकांश स्थानहरुमा हल्कादेखि मध्यम खालको वर्षा हुनेछ । पूर्व र पश्चिमका केही स्थानहरुमा भने भारी वर्षा हुन सक्ने मौसम पूर्वानुमान महाशाखाले जनाएको छ ।

महाशाखाले भोलि दिउँसो सामान्य बदली रही केहि स्थानहरुमा हल्कादेखि मध्यम खालको वर्षा हुन सक्ने अनुमान गरेको छ । आजजस्तै देशका पूर्व र पश्चिम क्षेत्रका केही स्थानमा भोलि पनि भारी वर्षाको सम्भावना रहेको जनाएको छ ।

असार २७ गते (बुधवार) दिउँसो सामान्य बदली हुने महाशाखाको अनुमान छ । मध्य तथा पश्चिम क्षेत्रका केही स्थानहरुमा भने भारी वर्षा हुने प्रक्षेपण महाशाखाले गरेको छ ।