सरकारका सय दिन अण्डरलाइन नेकपा निर्माण गर्नमा खर्च : निधि

 प्रमुख प्रतिपक्षी नेपाली कांग्रेसका उपसभापति बिमलेन्द्र निधिले सरकारका सय दिन देश, जनता र संघीयताको पक्षमा रत्तिभर पनि खर्च नभएको टिप्पणी गरेका छन् ।
कांग्रेसको भ्रातृ संगठन नेपाल प्रेस यूनियनको २७ औं स्थापना दिवसको अवसरमा आइतबार काठमाडौंमा आयोजित समारोहमा उपसभापति निधिले सरकारका सय दिन दलीय काम गर्नमा खर्च भएको टिप्पणी गरे । 
सरकारले सय दिनको अवधिमा संघीयता, समावेशिता र संविधान विरुद्ध सिण्डिकेट निर्माण गरेका, दलीय काममा खर्च गरेको र आत्मप्रशंसामा खर्च गरेको उनको भनाइ थियो ।  
‘‘संवैधानिक, संरचनागत र संगठनात्मक रुपले बाँकी काम गर्नुपर्ने काममा सरकारले एक दिन पनि खर्च गरेको छैन,’’ उपसभापति निधिले भने, ‘‘उसले सय दिन दुई पार्टी एकीककरण गर्नमा खर्च गर्यो । सरकारको सय दिन अण्डरलाइन नेकपा निर्माण गर्नमा खर्च भएको छ ।’’ 
सरकारले आफ्ना सय दिनलाई उत्तर र दक्षिणका छिमेकी मुलुकसँग गर्नमा खर्चेको पनि उनले आरोप लगाए । ‘‘सरकारका सय दिन भोट माग्नका लागि मात्रै राष्ट्रवादीको नक्कली प्रमाणपत्र लिएर जनताको बीचमा गएको हुँ । म त तपाईहरुकै हुँ नि भनेर दक्षिणलाई रिझाउन लम्पसारवादको गतिविधिमा संलग्न हुनका लागि खर्च गरेको छ,’’ कांग्रेस उपसभापति निधिले भने ।  
सरकारले सय दिनकै अवधिमा उत्तरतर्फ जाने र लम्पसार पर्ने योजना पनि बनाएको भन्दै उनले थपे, ‘‘दक्षिण र उत्तर गएर आलोपालो जता गयो उतै चाकडी गर्ने काममा सय दिन खर्च भएका छन् ।’’ 

  
कांग्रेस उपसभापति निधिले सरकारका सय दिनलाई विशेषज्ञ, राजनीतिज्ञ, पूर्व पदाधिकारी, विश्लेषकहरुले सतही रुपमा टिप्पणी गरेकोप्रति असन्तुष्टि पोखे ।