सुर्खेत । स्थानीय तहको निर्वाचन पछी गाउपालिकाको वडाध्यक्ष जित्नेलाई मोटर साइकल बाड्ने तयारी हुदै छ । चौकुने गाउँपालिकाले वडाध्यक्षलाई मोटर साइकल बाड्न लागिएको हो । उक्त मोटरसाइकल खरिदका लागी २२ लाख ५० हजार रकम विनियोजन गर्ने निर्णय भएको छ ।गाउँपालिकाले केन्द्रबाट ३० करोड ९५ लाख बजेट पाएको छ । आन्तरिक स्रोतबाट १० लाख जुटाउने योजना बनाएको गाउँपालिकाले मोटरसाइकल खरिदका लागि २२ लाख छुट्याएको छ ।गाउँपालिका कार्यालयमा मोटरसाइकल खरिद गर्न १० लाख र वडा कार्यालयमा मोटरसाइकल खरिद गर्न १२ लाख ५० हजार रकम छुट्याइएको छ । गाउँपालिकाका अध्यक्ष धिरबहादुर शाहीले सहजताका लागि मोटरसाइकल खरिद गर्न लागिएको बताए ।

एम्बुलेन्स समेत नभएको गाउँपालिकामा वडाध्यक्षलाई मोटरसाइकल किन्ने निर्णय भएको भन्दै स्थानीयले भने बिरोध जनाएका छन् ।स्थानीय किरण विसीले विरामी हुँदा समयमै उपचार नपाएर मृत्यु हुनुपर्ने बाध्यता रहेको गाउँपालिकामा एम्बुलेन्स खरिद नगरी मोटरसाइकल खरिदका लागि मात्रै २२ लाख ५० हजार रकम छुट्याइएको भन्दै यस्तो निर्णय सच्याउनु पर्ने माग गरेको बताए ।

सार्वजनिक यातायातबाट चढेर काम गर्न नसकिने तथा एम्बुलेन्स नहुनुसँग मोटरसाइकल खरिदको सम्बन्ध नभएको भन्दै सवारी साधन नभएका वडाको लागी मोटरसाइकल किन्न लागीएको गाउँपालिका अध्यक्ष शाहीले बताए । साथै गाउँपालिका कार्यालयका लागि पनि मोटरसाइकल खरिद गर्ने निर्णय भएको बताएका छन् ।

संघीय मामिला तथा स्थानीय विकास मन्त्रालयले पटक-पटक केन्द्रबाट गएको बजेट सवारी साधन, जनप्रतिनिधिको सुविधामा खर्च नगर्न निर्देशन दिएको भएता पनि त्यसको व्यवास्था गर्दै स्थानीय निकायहरुले त्यसलाई सिंहदरबारको हस्तक्षेप भन्दै विरोध गर्ने गरेका छन् ।