पहिरोमा परि ३ जनाको मृत्यु, ३ जना वेपत्ता

१८ असार, काठमाडौं । पर्वतमा पहिरोमा परेर एकै परिवारका तीन जनाको मृत्यु भएको छ । पर्वतको महाशिला गाउँपालिका १ होश्राङदीमा गएराती गएको पहिरोमा परेर स्थानीय ६३ वर्षिय तीर्थबहादुर मल्ल, उनकी श्रीमति ५५ वर्षिय यमकुमारी र आमा बिनाको पहिरोमा परेर मृत्यु भएको हो ।

पहिरोमा परेर वेपत्ता भएका तीनै जनाको शव पहिरोबाट निकालिएको जिल्ला प्रहरी कार्यालय पर्वतका प्रहरी नायव उपरीक्षक शेखर खनालले जानकारी दिए । पहिरोले तीर्थबहादुरको घर र गोठ समेत बगाएको छ ।

पहिरोका कारण जोखीममा परेका अन्य ६ घरलाई पनि अहिले सुरक्षित स्थानमा सार्ने काम भैरहेको प्रहरीको भनाई छ । पहिरो बस्तीभन्दा माथिबाट आएका कारण अन्य ६ घर पनि उच्च जोखिममा रहेको स्थानीय बासिन्दाले बताएका छन ।

त्यस्तै कास्कीमा एक जनाको मृत्यु भएको छ । चितवन र प्यूठानमा पहिरोेका कारण दुइ जना वेपत्ता भएका छन । प्यूठानको गौमुखी गाउँपालिका ३ मा पहिरोमा परेर १६ वर्षिय तुलसा घर्ती वेपत्ता भएको जिल्ला प्रहरी कार्यालय प्यूठानले जनाएको छ । पहिरोमा परेका अरु दुई जनाको भने सकुशल उद्दार गरिएको छ ।

यस्तै कास्कीको पोखरा लेखनाथ महानगरपालिकामा पहिरोमा परेर एक जनाको मृत्यु भएको छ । जिल्ला प्रहरी कार्यालय कास्कीका अनुसार पोखरा लेखनाथ महानगरपालिका १८ लभ्लीहिलका तारापति अधिकारीकोमा आएका १४ वर्षिय टंक क्षेत्रीको मृत्यु भएको हो । गएराती पहिरोमा परेका टंकलाई प्रहरीले उद्दार गरेपनि उपचारका क्रममा मृत्यु भएको हो ।

यसैबीच चितवनको कालिखोला नजिक पहिरोका कारण गाडी रोकिएपछि हेर्नका लागि गाडीबाट झरेका एक जना त्रिशुली नदिमा वेपत्ता भएका छन । विहेका लागि काठमाडौबाट नवलपरासीको दलदले हिडेको गरेको लु १ ख ९८८१ नम्बरको गाडीमा सवार जन्ती रञ्जन चापागाई सडकछेउबाट चिप्लिएर त्रिशुली नदीमा खसेको जिल्ला प्रहरी कार्यालय चितवनले जनाएको छ ।