मुलुकलाई निकास दिन निर्वाचन सारिएको : महरा

दाङ– उपप्रधान तथा परराष्ट्रमन्त्री कृष्णबहादुर महराले मुलुकलाई निकास दिनकै लागि २ नम्बर प्रदेशको चुनावको मिति सारिएको बताएका छन् । दाङको घोराहीमा कार्यकर्ता भेटघाटमा मन्त्री महराले निर्वाचनको मिति केही सार्दैमा मुलुकले निकास पाउँछ भने किन नसार्ने भनेर प्रश्न गरे ।भने ‘यसलाई हामीले त्यति ठूलो विषय बनाउनुहुँदैन ।’ सारिएको मितिभित्र प्रमुख प्रतिपक्षी दल नेकपा एमाले र राजपालाई सहमतिमा ल्याएर संविधान संशोधन गरिने महराको भनाइ थियो । महराले अहिलेका जनप्रतिनिधिहरुले सरकार सरह स्थानीय तहमा नीति निर्माण तथा बजेट खर्च गर्न सक्ने भन्दै सिंहदरवारको अधिकार गाउँमा पुग्ने बताए ।
‘सिंहदरवारको वरिपरि बस्नेहरुलाई यो मन परिरहेको छैन’ महराले भने ‘माओवादीको संघर्षका कारण जनताले बास्तविक सत्ता प्राप्त गरेका छन्, यसको रक्षा गर्नु अहिलेको अवाश्यकता हो ।’परराष्ट्रमन्त्री समेत रहेका  उपप्रम महराले नेपालले छिमेकी मुलुकहरुबीच सन्तुलित परराष्ट्र नीति अवलम्वन गर्ने जानकारी दिए । छिमेकका दुई ठूला मुलुक चीन र भारतको आर्थिक विकासबाट नेपालले फाइदा लिन सक्नुपर्ने उनकोे भनाई थियो ।