२४ चैत, काठमाडौं । स्वास्थ्य संवेदनशील विषय हो । कुनै रोग लाग्यो भने रोगको पहिचानमार्फत बिरामीहरुले औषधि सेवन गर्छन् । तर, बिरामीले सेवन गर्ने त्यही औषधिहरु गुणस्तरहीन भएको खुल्न आएको छ । जसले गर्दा ज्यान बचाउन र स्वस्थ हुन औषधि खानेहरु औषधि गुणस्तरहीन हुँदा मरिने पो हो कि भन्ने चिन्ताले त्रस्त छन् ।
नेपाल समाचारपत्र दनिकका अनुसार बजारमा बिक्री भइरहेका केही कम्पनीको औषधि गुणस्तरहीन भएको पत्ता लागेको छ । औषधि व्यवस्था विभागले आर्थिक वर्ष ०७३–७४ मा गरेको अनुगमनका क्रममा तीनवटा कम्पनीले बिक्री गरिरहेको औषधिको गुणस्तर निकै खस्किएको खुल्न आएको हो ।
औषधि व्यवस्था विभागको नियमितकार्यक्रमअन्तर्गत अनुगमनका क्रममा दुई भारतीय र एक नेपाली कम्पनीको औषधि मापदण्डविपरीत रहेको विभागका सूचना अधिकारी सन्तोष केसीले बताए ।
