अल्का अस्पतालका डाक्टर र नर्सको हदैसम्मको लापरवाहिका कारण फेरी ज्यान गयो

काठमाडौं– ललितपुरको जावलाखेलमा रहेको अल्का अस्पतालमा एक बिरामीको मृत्यु भएको छ ।
सुनसरीको धरानकी ५६ वर्षीया  गंगा राईको मृत्यु भएको हो । मृतकका आफन्तले अस्पतालको लापरबाहीले बिरामीको मृत्यु भएको आरोप लगाउँदै दोषीलाई कारबारी र उचित क्षतिपूर्तिको माग गरेका छन् ।

कलोजोको रोगी गंगाले २ वर्षयता नियमित अल्कामै चेक जाँच गराउँदै आएकोमा फेरि एकाएक थप समस्या देखिएपछि आफन्तले बुधबार दिउँसो अस्पताल पुर्याएका थिए ।

अस्पतालमा पुर्याउँदासम्म अवस्था त्यति जटिल नभएको मृतकका ज्वाई राजकुमार राईले बताए । अस्पतालले बिरामीलाई आइसियुमा राख्नुपर्ने बताएपछि त्यहाँ पठाइएको तर आइसियुमा लापरबाही गरिएकाले अकालमै आफ्नो सासुको मृत्यु हुन पुगेको उनले* बताए ।
राजकुमारका अनुसार अस्पतालका डाक्टर तुप्चेन लामाको सिफारिसमा गंगालाई आइसियुमा पठाइएको थियो । तर अस्पतालले आइसियुमा डाक्टर त परै जाओस् नर्स समेत नहुँदा आमाको अकालमा मृत्यु हुन पुगेका छोरी पुनमले  रुँदै रातोपाटीलाई बताइन् ।

आफन्तका अनुसार राती एकाएक बिरामीको मृत्यु भएको जानकारी अस्पतालले आफन्तलाई दिएको थियो ।
मृत्यु पश्चात अस्पतालले पीडितलाई उचित क्षतिपूर्ति र दोषी डाक्टरलाई कारबाही गर्ने भनि प्रतिबद्धता जनाएपनि कार्यान्वयन हुन नसकेपछि घटना बाहिर आएको हो ।
अस्पतालका कलेजो रोग विशेषज्ञ अनन्त श्रेष्ठले तत्काल दोषीलाई कारबाही गर्ने भनि घटनालाई थामथुम पार्ने प्रयास गर्दै शब बुझ्न समेत बाध्य पारेको राजकुमारले बताए । अहिले मृतकको शब त्रिवि शिक्षण अस्पताल महाराजगञ्जमा राखिएको छ ।

आफन्तले उचित क्षतिपूर्ति पाउनु पर्ने, दोषी डाक्टरमाथि कारबाही हुनुपर्नेलगायतका माग राखेका छन् । उनीहरुले माग पूरा नभए अस्पताल घेराउ गर्नेसम्मको चेतावनी दिएका छन् भने मृतकको अन्यष्टि पनि नगर्ने बताएका छन् ।