आईतबार काठमाडौमा भएको साक्षात्कारमा उपाध्यक्ष रावलले चुनाव लोकतन्त्रको महत्वपूर्ण चरण भएकोले तोकिएकै मितिमा एकै चरणमा निर्वाचन हुनुपर्ने बताए ।
उनले मधेशी मोर्चा सम्मिलित संघीय गठबन्धनले घोषणा गरेको आन्दोलनले देशको कुनै पनि भूभागमा निर्वाचन नरोकिने समेत दाबी गरे । उनले भने,‘मोर्चाका नेताहरुपनि चुनावमा जान डराउनुहुँदैन्, जनतामा जान किन डराउने ?’

उनले आफ्नो पक्षमा जनता भएको दाबी गर्ने मधेशी मोर्चालाई चुनावमार्फत आफ्नो मत ल्याएर प्रमाणित गरेर देखाउन चूनौति पनि दिए ।

उनले भने,‘जनताको मत लिनका लागि किन तयार नहुने ? अनि चुनावको मुखमा आएर हुन दिन्नौं भनेर धम्की दिनु भनेको मोर्चा जनताको पक्षमा छैन् ।’ उनले मोर्चा तथा संघीय गठबन्धनको आमहड्तालसहित आन्दोलन गर्ने निर्णय मधेशी जनताको हितमा पनि नभएको स्पष्ट पारे ।

उनले १९ वर्षपछि हुन गैरहेको स्थानीय तहको निर्वाचन हुन दिन्नौं भनेर धम्की दिनु नेपालको अस्तित्व नै समाप्त पार्ने ठूलो चक्रव्युह रच्ने काम मात्रै भएको आरोप लगाए । रावलले घोषित मितिमै निर्वाचन हुने समेत दाबी गरे । उनले थपे,‘जनता चुनाव भाँड्ने पक्षमा छैन् ।’ रावलले चुनाव सार्ने, टार्ने काम नगर्न समेत सरकारलाई आग्रह गरे ।