मनपरी नाम र केन्द्र परिवर्तन नगर्न स्थानीय तहलाई मन्त्रालयको निर्देशन

काठमाडौं । संविधान जारी भएसँगै कार्यान्वयनमा आएको स्थानीय तहलाई आफूखुसी नाम र केन्द्र परिवर्तन नगर्न मन्त्रालयले निर्देशन दिएको छ ।

स्थानीय तहले आफूखुसी मनपरी ढंगले नाम र केन्द्र तोकेको भन्दै संघीय मामिला तथा स्थानीय विकास मन्त्रालयले यस्तो निर्देशन दिएको हो ।

स्थानीय तहले नाम र केन्द्र परिवर्तन गर्न सक्ने भए पनि यस विषयको जानकारी मन्त्रालयलाई दिनुपर्नेमा आफूखुसी परिवर्तन गरेको भन्दै मन्त्रालयले निर्देशन दिएको हो ।
केही स्थानीय तहले आफूखुसी नाम र केन्द्र परिवर्तन गरेको जानकारी मन्त्रालयले प्राप्त गरेकाले स्थानीय तहलाई यस्तो नगर्न निर्देशन दिइएको मन्त्रालयका प्रवक्ता रुद्रसिंह तामाङले बताए । 

“स्थानीय तहलाई प्रथम पटक साधारण बहुमतबाट र त्यसपछि दुई तिहाई बहुमतबाट नाम र केन्द्र परिवर्तन गर्न सक्ने अधिकार छ, यद्यपि, त्यसरी परिवर्तित नाम र केन्द्रको बारेमा मन्त्रालयलाई जानकारी दिनुपर्ने साथै मन्त्रालयले परिवर्तित केन्द्र र नामसमेतलाई राजपत्रमा प्रकाशित गरेर आधिकारिकता प्रदान गर्ने व्यवस्था भए पनि नाम र केन्द्र परिवर्तन गरेर चुप लागेर बसेको पाइएकाले यस्तो निर्देशन दिइएको छ,” मन्त्रालयले जारी गरेको विज्ञप्तिमा जनाइएको छ ।