आजका पत्रपत्रिकाका मुख्य समाचारहरु

१० वैशाख, काठमाडौं । आइतबार प्रकाशित राष्ट्रिय दैनिक पत्रिकाहरुले निर्वाचनको विरोधमा रहेको मधेसी मोर्चा निर्वाचनमा आउने सहमति बनेको र निर्वाचन दुई चरणमा हुन लागेको लेखेका छन् । यद्यपि, सरकार र मधेसी दलबीच भएको सहमतिमा भने एमालेले असन्तुष्टि जनाएको छ । एमालेको असन्तुष्टि छलफल प्रक्रियामा सहभागी नगराइएकामा हो ।

गोरखापत्र दैनिकले सरकार र मोर्चाबीच भएको सहमतिलाई मुख्य खबर बनाउँदै निर्वाचन दुई चरणमा हुने लेखेको छ । गोरखापत्रमै प्रतिकूल प्रभाव पार्ने गरी चुनाव सार्न नसकिने भनेर प्रमुख निर्वाचन आयुक्त अयोधीप्रसाद यादवले व्यक्त गरेको भनाइ पनि छापिएको छ ।

नयाँ पत्रिका दैनिकले स्थानीय निर्वाचन दुई चरणमा हुने लेखेको छ । संघीय प्रहरी ऐनको मस्यौदाबारेको एक सामग्री पनि नयाँ पत्रिकामा प्रकाशित छ ।

स्थानीय तह निर्वाचन दुई चरणमा शीर्षक दिएर मुख्य खबर लेखेको राजधानी दैनिकले लोकसेवाकै मिलेमतोमा निलम्बित कर्मचारी बढुवा भएको अर्को सामग्री पहिलो पृष्ठमा पस्केको छ ।

निर्वाचन दुई चरणमा हुनेदेखि मणिपालको घाइते फर्काएको सम्मका खबर अन्नपूर्ण पोस्ट दैनिकको पहिलो पृष्ठमा छ ।

निर्वाचनकै विषयलाई प्रमुख समाचार बनाएको नागरिक दैनिकले ‘मदन पुरस्कार विजेताः एकै थलोमा हजुरबा, नाति पुस्ता’ शीर्षक दिएर एक सामग्री छापेको छ ।
कान्तिपुर दैनिकले ‘अन्ततः मधेसी दल चुनावमा शीर्षक दिएर मुख्य खबर लेखेको छ ।