नेपालमा थप १५६ जनामा कोरोना संक्रमण भेटिएको छ । योसँगै कुल संक्रमितको संख्या १०४२ पुगेको छ । स्वास्थ्य मन्त्रालयका अनुसार विहीबारसम्म कोरोना संक्रमणबाट ५ जनाको मृत्यू भइसकेको छ ।
विहीबार स्वास्थ्य मन्त्रालयको नियमित पत्रकार सम्मेलनमा बोल्दै प्रवक्ता डा. विकास देवकोटाका अनुसार काठमाडौंको प्रयोगशालामा ७७ जनामा संक्रमण देखिएको पुष्टि भएको छ भने अन्य काठमाडौं उपत्यका बाहिरका प्रयोगशालामा परीक्षणबाट पुष्टि भएका हुन् ।
विहीबारसम्म थप ४ जना अस्पतालबाट डिस्चार्ज भएसँगै कुल निको हुनेको संख्या १८७ पुगेको छ ।
ललितपुरको किस्ट मेडिकल कलेजमा जेठ १४ गते मृत्यु भएका ५६ वर्षीय पुरुषमा पनि कोरोना संक्रमण देखिएसँगै मृतकको संख्या ५ पुगेको हो । उनी कलेजोका बिरामी थिए।
यसअघि सिन्धुपाल्चोककी सुत्केरी महिला, बाँके नरैनापुरका २५ वर्षीय युवा, गुल्मी मदानेका ४३ वर्षीय पुरुष र वीरगञ्जको नेसनल मेडिकल कलेजमा उपचाररत ६५ वर्षीय पुरुषको मृत्यु कोरोना भाइरसबाट मृत्यु भएको थियो।
