काठमाडौं, २७ फागुन । नेत्रविक्रम चन्द ‘विप्लव’ नेतृत्वको नेकपा माओवादीले नेपालमाथिको हस्तक्षेप नरोकिए भारतीय राजदूतावास ध्वस्त पार्ने चेतावनी दिएको छ ।
शुक्रबार विप्लव माओवादीका प्रवक्ता खड्गबहादुर विश्वकर्मा ‘प्रकाण्ड’ले सम्वाद डबलीमा आयोजित पत्रकार सम्मेलनमा कञ्चनपुरको घटनाको कडा शब्दमा विरोध गर्दै भारतीय हस्तक्षेप नरोकिए लैनचौरमा रहेको राजदूतावास पनि नरहने चेतावनी दिए ।
उनले भने– ‘नेपालमाथि भारतले विभिन्न रुपमा गर्दै आएको हस्तक्षेप नरोकिए लैनचौरमा रहेको भारतीय दूतावास पनि रहन नसक्ने अवस्था आउँछ । नेपालमाथिको हस्तक्षेप तुरुन्त बन्द गर्नुपर्छ ।’
उनले नेपाली भुमिका पसेर नेपाली नागरिककै हतया गर्ने एसएसबीलाई कानूनी कठघरामा उभ्याएर कारवाही गर्न सरकारसँग माग गरे । ‘यदि हत्यामा संलग्नहरुलाई कारवाही भएन हामी कडा आन्दोलनमा उत्रिन्छौं ।’
यस्तै आजै विप्लव माओवादीका कार्यकर्ताले भारतीय दूतावासअगाडि प्रदर्शन गर्दै भारतको झण्डा जलाइदिएका छन् । र, देशका विभिन्न भागमा भारतीय सवारी साधनमाथि तोडफोड र आगजनी गरिरहेका छन् ।
